Myftiu Tërnava pas faljes së namazit të Bajramit, bën thirrje për ndaljen e vrasjeve

Në manifestimin qendror për festën e Fitër Bajramit që u mbajt në Xhaminë e Madhe në Prishtinë, Myftiu i Kosovës, Naim Tërnava, mbajti ligjëratë e përcolli mesazhet për paqe, dashuri, harmoni dhe tolerancë ndërmjet njerëzve.

Në veçanti Myftiu Tërnava foli për rëndësinë që Islami i jep familjes dhe prindërve.

“Normat të cilat burojnë nga Kurani dhe hadithet e Muhamedit a.s., saktësojnë se një qift bashkëshortor – burri dhe gruaja, janë themel i familjes. Po ashtu, prindërit janë edhe edukatorët e parë të fëmijëve, duke i pajisur ata me edukatë dhe moral të lartë, me qëllim që të kemi familje dhe shoqëri të formuar mirë, në rrugën e Zotit dhe në shërbim të familjes, rrethit dhe shoqërisë. Sipas Islamit, fëmijët janë një amanet nga Zoti, e që ne si prindër, e kemi për obligim të kujdesemi, t’i ruajmë, t’i edukojmë, t’i shkollojmë e t’i formojmë si qenie fisnike, duke ua mbjellë në zemrat e tyre dashurinë për njëri-tjetrin, familjen, atdheun dhe shoqërinë”, tha ai.

Myftiu Tërnava përveç kujdesit që duhen të kenë prindërit ndaj fëmijëve, foli edhe për përkujdesjen që duhet të kenë fëmijët ndaj prindërit, sidomos kur ata të kenë arritur moshën e shtyrë.

“Përveç kësaj, edhe prindërit janë amanet i fëmijëve, në veçanti atëherë kur ata kanë arritur moshën e pleqërisë, apo kanë kërkesën më të madhe për përkujdesje dhe ndihmë nga ana e fëmijëve të tyre. Islami urdhëron për ruajtjen e lidhjeve familjare dhe farefisnore, urdhëron për përkujdesje të vazhdueshme dhe të drejtë ndaj prindërve, sidomos kur ata janë në moshë të shtyrë”, tha Myftiu Tërnava.

Në fund të kësaj hytbeje, Myftiu Tërnava apeloi të ndalen vrasjet dhe t’i kushtohet rëndësi jetës së njeriut duke marrë shkas rastet e fundit në Kosovë. Ai tha se Islami na mëson ndryshe.

“Pavarësisht motiveve dhe rrethanave, në Islam, vrasja është një akt i ndaluar dhe është një nga gjynahet më të mëdha. Feja islame i jep shumë rëndësi jetës së njeriut dhe mbrojtjes së saj. Kurani e potencon qartë ndalimin e vrasjes së tjetrit, për se në të thuhet: “Kush vret një njeri pa të drejtë, është sikurse të ketë vrarë të gjithë njerëzimin. Dhe kush shpëton një jetë, është sikurse të ketë shpëtuar gjithë njerëzimin’, Andaj, edhe njëherë apelojmë për respektimin e jetës së çdo individi dhe për ndalimin e dhunës ndaj të pafajshmëve”, tha ndër të tjera Myftiu Tërnava.

The post Myftiu Tërnava pas faljes së namazit të Bajramit, bën thirrje për ndaljen e vrasjeve appeared first on Albinfo.