Ndahet nga jeta në moshën 100 vjeçare veprimtari Astrit Leka

Shqiptari mbase më i moshuar në Zvicër, veprimtari i shquar Astrit Leka, ka ndërruar jetë sot, në Gjenevë, pak muaj pasi kishte mbushur plot një shekull jetë. Në dhjetor të vitit të kaluar ai kishte mbushur 100 vjet.

Astrit Leka është bërë i njohur me iniciativën e tij të kurorëzuar me sukses për vendosjen, në fund të viteve `90, të bustit të heroit tonë kombëtar, Gjergj Kastrioti Skënderbeu, në një park të Gjenevës.

Leka është i lindur në dhjetor të vitit 1924 në Shqipëri, ka mbaruar liceun e njohur të Korçës dhe ka marrë pjesë në luftën çlirimtare në vitet 1939-1944.

Nga viti 1990 ai ka jetuar në Gjenevë ku ka qenë në krye të shoqatës për solidarizim me njerëzit në Evropën Lindore “Solidest” dhe këshilltar në shoqata të ndryshme ndërkombëtare të veteranëve të Luftës së Dytë Botërore, po në Gjenevë.

Është i njohur kontributi i tij në këto pozicione, për sensibilizimin me çështjen kombëtare shqiptare dhe atë të Kosovës.

Në vitin 2018, në kuadrin e shënimit të 550 vjetorit të ikjes në amshim të Sjkënderbeut, Ambasada e Shqipërisë në Bernë, në një organizim të veçantë i pati ndarë Astrit Lekës Certifikatën e Mirënjohjes. Kjo certifikatë i është ndarë në cilësinë e patriotit, aktivistit dhe intelektualit të shquar dhe nismëtarit dhe realizuesit të vendosjes së bustit të heroit tonë kombëtar Gjergj Katsriot Skënderbeu në Gjenevë.

The post Ndahet nga jeta në moshën 100 vjeçare veprimtari Astrit Leka appeared first on Albinfo.