Rohde: Qeveri e qëndrueshme, çelësi për stabilitet dhe zhvillim në Kosovë

Ambasadori i Gjermanisë në Kosovë, Jorn Rohde, ka theksuar rëndësinë e formimit të një qeverie të qëndrueshme dhe me konsensus të gjerë në Kosovë, duke e krahasuar situatën politike në vend me atë në Gjermani pas zgjedhjeve të fundit, transmeton albinfo.ch.

Në një intervistë për Ekonomia Online, Rohde tha se krijimi i një shumice të qëndrueshme është jetik për stabilitetin dhe zhvillimin afatgjatë të vendit.

“E dini, si në vendin tim, sapo patëm zgjedhje. Duhet kohë për të formuar një qeveri. Më e rëndësishmja është që të kemi një qeveri të qëndrueshme me një shumicë të mirë dhe konsensus për të formuar qeverinë e re. Dhe kështu po shoh drejt Gjermanisë. Shpresojmë të formojmë një qeveri deri javën e ardhshme,” deklaroi Rohde.

Ai theksoi se në një klimë të paqëndrueshme gjeopolitike, qeveritë e forta janë esenciale për të mirën e qytetarëve dhe të vetë shtetit, transmeton albinfo.ch.

Duke komentuar mbi ndikimin e faktorëve ekonomikë ndërkombëtarë, ambasadori gjerman përmendi politikat doganore të SHBA-së si një shembull që ka ndikim të drejtpërdrejtë në ekonomitë globale.

“Nëse nuk ka stabilitet, do të ketë ndikim në zhvillimin ekonomik. Ju e shihni tani: keni politikën doganore amerikane, e cila ndikon në çdo vend dhe vendet po reagojnë ndaj saj. Kjo, natyrisht, ndikon në stabilitetin ekonomik. E shihni edhe në tregjet e aksioneve, të cilat po bien,” tha ai për EO.

Në fund të intervistës, Rohde theksoi nevojën për “patriotizëm kushtetues”, duke vlerësuar rolin qendror të Gjykatës Kushtetuese në një demokraci funksionale.

“Tre shtyllat e një demokracie janë gjyqësori, pushteti ekzekutiv dhe legjislativ, prandaj është shumë e rëndësishme të kemi një institucion si Gjykata Kushtetuese. Demokracia kushtetuese mund të lulëzojë vetëm nëse respektohen rregullat e lojës,” përfundoi Rohde.

Ai theksoi se vetëm përmes respektimit të institucioneve dhe rregullave, mund të ndërtohet një demokraci e qëndrueshme dhe funksionale në Kosovë, transmeton albinfo.ch.

The post Rohde: Qeveri e qëndrueshme, çelësi për stabilitet dhe zhvillim në Kosovë appeared first on Albinfo.