Rubio: Ukraina duhet të bëjë lëshime, është e vetmja mënyrë për t’i dhënë fund luftës

Ukraina duhet të braktisë disa nga territoret e pushtuara nga Rusia që nga viti 2014, në mënyrë që të ketë ndonjë marrëveshje për t’i dhënë fund luftës, tha të hënën Sekretari Amerikan i Shtetit Marco Rubio , gjatë udhëtimit të tij në Arabinë Saudite për bisedimet e paqes të planifikuara me delegacionin ukrainas.

Rubio theksoi se koncesionet nga Kievi janë e vetmja mënyrë për t’i dhënë fund pushtimit në shkallë të gjerë të nisur nga Rusia në Ukrainë në shkurt 2022.

“[Ukrainasit] kanë vuajtur shumë dhe njerëzit e tyre kanë vuajtur shumë, dhe është e vështirë pas diçkaje të tillë të flasim edhe për lëshime,” u tha ai gazetarëve duke shtuar: “Por kjo është mënyra e vetme për t’i dhënë fund gjithë kësaj dhe për të shmangur më shumë vuajtje”.

Bisedimet vendimtare të planifikuara në Arabinë Saudite janë bisedimet e para të nivelit të lartë midis zyrtarëve amerikanë dhe qeverisë së Kievit që nga përplasja verbale e presidentit ukrainas Volodymyr Zelensky me Donald Trump dhe zëvendëspresidentin amerikan J.D. Vance në Shtëpinë e Bardhë, përpara kamerave të mediave ndërkombëtare.

Duke shtuar se “asgjë nuk do të para-negociohet”, Rubio tha se pala amerikane do të kërkojë të kuptojë se çfarë është “i gatshëm të bëjë Kievi për të bërë paqe” dhe për t’i dhënë fund luftës.

“Mund të mos jetë në përputhje me atë që rusët janë të gatshëm të bëjnë,” vuri në dukje ai, duke shtuar se “kjo është ajo që ne duhet të zbulojmë.”

Ukraina ka përjashtuar prej kohësh një marrëveshje armëpushimi që do të bënte që Rusia të dorëzonte territorin, duke përfshirë gadishullin e Krimesë, të cilin Vladimir Putin e pushtoi në vitin 2014. Në vend të kësaj, qeveria ukrainase po kërkon një “paqe të drejtë” në të cilën Kremlini do të paguante dëmshpërblime për luftën trevjeçare./abcnews.al