Salzburg: Shoqata “Naim Frashëri” feston 17-vjetorin e Pavarësisë së Kosovës

Në zemër të Evropës, larg atdheut, por gjithmonë të bashkuar shpirtërisht me të, shqiptarët në diasporë shënuan me emocion dhe krenari 17-vjetorin e Pavarësisë së Kosovës, përcjell albinfo.ch.

Shoqata e Mësuesve Shqiptarë “Naim Frashëri” organizoi një program festiv në Salzburg, ku fëmijët dhe të rinjtë ishin protagonistët kryesorë të një pasditeje të mbushur me art, kulturë dhe atdhedashuri.

Me veshje tradicionale, me zërat e tyre të pastër dhe me interpretimet plot shpirt, nxënësit sollën një atmosferë të paharrueshme. Programi përfshiu këngë e valle tradicionale,  recitime mbi historinë e Kosovës dhe pjesë skenike që përcillnin mesazhe të forta identiteti.

Në sytë e të pranishmëve lexohej emocion dhe nostalgji, ndërsa duartrokitjet e fuqishme ishin dëshmi e gëzimit dhe vlerësimit për punën e palodhur të organizatorëve dhe pjesëmarrësve. Ishte një ditë që jo vetëm festoi pavarësinë e Kosovës, por edhe forcoi lidhjet e komunitetit shqiptar në mërgim, duke treguar se kultura dhe gjuha shqipe janë ura të pathyeshme që na bashkojnë kudo në botë.

Pavarësia e Kosovës është një fitore historike për kombin shqiptar, dhe përmes festave si kjo, shqiptarët në diasporë dëshmojnë se atdheu mbetet gjithmonë i gjallë në zemrat dhe shpirtin e tyre.

The post Salzburg: Shoqata “Naim Frashëri” feston 17-vjetorin e Pavarësisë së Kosovës appeared first on Albinfo.