Shtetësia, migracioni i paligjshëm, punëtorët e kualifikuar, planet e qeverisë re gjermane për të huajt?

Formimi i qeverisë së re në Gjermani, mes Unionit (CDU/CSU) dhe SPD-së, ka sjellë zhvillime të rëndësishme për qytetarët e huaj në vend. Një nga zotimet më të rëndësishme është ruajtja e ligjit për shtetësinë e dyfishtë, i cili hyri në fuqi në qershor 2024 dhe u konsiderua një nga arritjet kryesore të koalicionit të mëparshëm “semafor”, shkruan The Local.

Ky qëndrim përfaqëson një kompromis të madh nga CDU dhe CSU, të cilat gjatë fushatës kishin premtuar anulimin e këtij ligji. Pranimi për ta lënë atë në fuqi shihet si një hap i rëndësishëm në negociatat me SPD-në dhe një sinjal se Unioni është i gatshëm për lëshime serioze në formimin e qeverisë, përcjell albinfo.ch.

Megjithatë, qeveria e re ka paralajmëruar se do t’i japë fund rrugës së përshpejtuar trevjeçare për natyralizim për të huajt “të integruar në mënyrë të jashtëzakonshme”, duke e rikthyer afatin standard pesëvjeçar si të vetmin opsion për shtetësi.

Për fëmijët me prejardhje migrimi, qeveria planifikon të prezantojë teste gjuhësore mbarëkombëtare për fëmijët katërvjeçarë, për të vlerësuar aftësitë e tyre në të folur, lexim dhe dëgjim, në përputhje me moshën, shkruan The Local.

Në përpjekje për të ndihmuar emigrantët e kualifikuar të hyjnë më lehtë në tregun gjerman të punës, është paralajmëruar krijimi i një “Agjencie Pune dhe Qëndrimi”, që do të ndihmojë në procesin e integrimit profesional dhe ligjor.

Por krahas këtyre masave lehtësuese, qeveria e re paralajmëron një qasje shumë më të ashpër ndaj migracionit “të parregullt”. Sipas qëndrimit të Unionit, do t’i jepet fund bashkimit familjar për ata që kanë mbrojtje të përkohshme, do të ndalohet hyrja e azilkërkuesve në kufi dhe do të nisë një “ofensivë deportimi” për personat pa të drejtë qëndrimi, pwrcjell albinfo.ch.

Po ashtu, është përmendur mundësia e heqjes së shtetësisë gjermane për shtetasit e dyfishtë që mbështesin ide “ekstremiste apo antisemitike”, por mbetet e paqartë si do të zbatohet kjo masë dhe nëse është e ligjshme sipas Kushtetutës gjermane, shkruan The Local.

The post Shtetësia, migracioni i paligjshëm, punëtorët e kualifikuar, planet e qeverisë re gjermane për të huajt? appeared first on Albinfo.