Tahiri, qeverisë: Largojeni taksën ndaj Amerikës e u bëtë gazi i botës

Ish-shefi i deputetëve të AAK-së, Besnik Tahiri, i ka kërkuar Qeverisë së Kosovës që ta largojnë taksën ndaj ShBA-së për importin për të gjitha produktet amerikane.

Kjo kërkesë e Tahirit vjen pas deklaratës që Komandanti Suprem i Forcave Aleate për Evropën, Gjenerali amerikan, Christopher Cavoli, e bëri në raportimin e tij përpara Senatit, ku konfirmoi përkushtimin e ShBA-së ndaj Kosovës.

“Tash paramendoni, Qeveria e Kosovës ende analizon apo edhe heziton ta largojë një taksë ndaj Shtetit Amerikan, që nuk ka asnjë ndikim në buxhetin e Kosovës. Largojeni këtë taksë, se u bëtë gazi i botës”, shkroi Tahiri

Kërkesë zyrtare qeverisë për pezullimin e tarifave të importit për të gjitha produktet amerikane i ka bërë edhe e para e shtetit, Vjosa Osmani.

Ajo po ashtu i kërkoi kryeministrit në detyrë që përveç pezullimit, ta forcojë aleancën me ShBA-në.