Tre vjetori i pushtimit të Ukrainës, BE “godet” Rusinë me sanksione të reja

Bashkimi Evropian ka goditur Rusinë me një raund të ri sanksionesh. Ky është raundi i 16-të i sanksioneve nga blloku evropian që kur Rusia nisi pushtimin e plotë të Ukrainës tre vjet më parë.

Paketa e fundit shtrin ndalimet për importet e aluminit nga Rusia. Gjithashtu pothuajse dyfishon numrin e anijeve në të ashtuquajturën “flota hije” e Rusisë, të cilat synojnë të shmangin sanksionet e mëparshme, duke e rritur totalin në 153.

“Ky raund i ri sanksionesh nuk synon vetëm flotën ruse në hije, por ata që mbështesin funksionimin e cisternave të pasigurta të naftës, kontrollorët e lojërave të përdorura për të pilotuar dronët, bankat e përdorura për të anashkaluar sanksionet tona dhe mjetet propagandistike të përdorura për të nxjerrë gënjeshtra,” thotë kryediplomatja BE-së, Kaja Kallas.

“Me bisedimet në vazhdim për t’i dhënë fund agresionit të Rusisë, ne duhet ta vendosim Ukrainën në pozicionin më të fortë të mundshëm. Sanksionet ofrojnë levë,” shtoi ajo.

Sanksionet që kufizojnë tregtinë, financimin ose udhëtimin, ose ngrijnë asetet, janë përdorur gjerësisht nga vendet perëndimore kundër Rusisë që nga pushtimi i saj në shkallë të plotë të Ukrainës./abcnews.al