Uniteti i grave shqiptare në Zvicër reflektim, motivim dhe mbështetje

Në një atmosferë të ngrohtë dhe inspiruese, “, më 8 Mars 2025 në Bernë Shoqata Kulturore dhe Shoqërore Shqiptare (ShKSh) “Bashkimi, në bashkëpunim me “Besa Plus” Bernë dhe Qendrën për Këshilla Juridike, Psikoterapi dhe Shërbime Sociale, organizoi një aktivitet domethënës me rastin e Ditës Ndërkombëtare të Gruas. Ky event mblodhi së bashku gra nga trevat shqiptare, të cilat ndanë përvojat, sfidat dhe sukseset e tyre në Zvicër, duke krijuar një hapësirë të vërtetë dialogu dhe mbështetjeje reciproke.

Takimi u zhvillua përmes një programi të larmishëm dhe të menduar me kujdes:

Prezantimi i shërbimeve të ofruara nga Qendra “Besa Plus”, duke informuar gratë për mundësitë e mbështetjes juridike, psikologjike dhe sociale. Në shenjë mbështetjeje për gratë, “Besa Plus” ofroi dhuratë një orë këshillimi falas për të gjithë të pranishmet, duke lehtësuar qasshmërinë në ndihmën e specializuar. Diskutim në panel, ku gra të suksesshme ndanë historitë e tyre të jetës, sfidat dhe përpjekjet për integrim në Zvicër. Marshim simbolik përpara Parlamentit zviceran, një gjest i fuqishëm që pasqyroi unitetin dhe përpjekjet për avancimin e të drejtave të grave. Mbyllja e aktivitetit me një bashkëbisedim të hapur, duke forcuar lidhjet dhe rrjetëzimin mes pjesëmarrësve.

Diskutime të thelluara mbi sfidat dhe mundësitë e grave shqiptare në Zvicër

 

Takimi u hap me një prezantim të detajuar nga përfaqësueset e Besa Plus, të cilat hodhën dritë mbi shërbimet e vlefshme që qendra ofron për gratë. Ky informacion ishte thelbësor për të ndihmuar pjesëmarrëset të kuptojnë më mirë se si mund të përfitojnë nga mbështetja profesionale në fushën juridike, psikologjike dhe sociale.

Në vijim, diskutimi në panel solli një gamë të gjerë perspektivash, nga përvojat e grave që kanë sfiduar barrierat e integrimit deri te strategjitë për përmirësimin e jetës profesionale dhe sociale. Gratë ndanë histori prekëse, duke e kthyer këtë diskutim në një moment reflektimi dhe inkurajimi.

Dëshmi inspiruese: Gratë që bëjnë ndryshimin

Një nga kulmet emocionale të takimit ishin rrëfimet e disa grave të cilat, përmes përpjekjeve dhe këmbënguljes së tyre, kanë arritur të krijojnë një jetë të qëndrueshme dhe të suksesshme në Zvicër. Dëshmitë e tyre prekëse u mirëpritën shumë mirë, duke krijuar një ndjenjë të fuqishme bashkëpunimi dhe motivimi për të gjitha të pranishmet.

Mesazh falënderimi dhe angazhim për të ardhmen

Në përmbyllje të aktivitetit, Teuta Gashi-Kryeziu, përfaqësuese e Komisionit të Gruas në ShKSh “Bashkimi”, shprehu mirënjohjen e saj për të gjitha gratë pjesëmarrëse dhe për organizatorët që e bënë të mundur këtë aktivitet. “Ky takim ishte shumë më tepër se një ngjarje simbolike – ishte një dëshmi e fuqisë së gruas kur bashkohet, ndan përvoja dhe mbështet njëra-tjetrën,” tha ajo, duke theksuar se ShKSh “Bashkimi” do të vazhdojë të mbështesë dhe fuqizojë gratë shqiptare në diasporë.

Ky aktivitet në Bernë dëshmoi edhe një herë se komuniteti shqiptar në Zvicër është i gatshëm të mbështesë gratë në rrugëtimin e tyre drejt barazisë dhe suksesit. Me shpresën se kjo frymë do të vazhdojë të rritet, pjesëmarrëset u larguan me frymëzim dhe vendosmërinë për të ndikuar pozitivisht në jetën e tyre dhe të komunitetit.

 

The post Uniteti i grave shqiptare në Zvicër reflektim, motivim dhe mbështetje appeared first on Albinfo.