Vjen reagim i parë nga Letonia pas incidentit të Kurtit me dy rusët: I dënojmë taktikat ruse

Kryeministri Albin Kurti ra pre e dy humoristëve rusë të njohur si Vovan dhe Lexus, të cilët iu prezantuan atij si presidenti i Letonisë në një bisedë me video. Për këtë incident të sikletshëm për Kurtin është në dijeni presidenti letonez Edgars Rinkēvičs, zyra e të cilit në një përgjigje për Gazetën Express tha se e dënojnë këtë akt si pjesë e propagandës ruse.

Gjashtë ditë pas vizitës së presidentit të Letonisë, Edgars Rinkēvičs, dy komedianët rusë Vladimir Kuznetsov dhe Alexei Stolyarov, të njohur si Vovan dhe Lexus, dje publikuan një video të bisedës me kryeministrin Albin Kurti ku u prezantuan si presidenti i Letonisë. Megjithatë, biseda ishte zhvilluar dy ditë pas zgjedhjeve të 9 shkurtit, siç sqaroi më pas Zyra e Kryeministrit.

Për këtë incident Presidenca letoneze në një përgjigje për Gazetën Express tha se janë në dijeni dhe se e dënojnë këtë akt si formë të propagandës ruse.

“Ne jemi në dijeni për këtë incident dhe dënojmë taktika të tilla si një formë e propagandës ruse dhe dezinformimit”, tha zëdhënësi i Presidencës së Letonisë, Dāvis Doršs.

Në arsyetimin e incidentit, edhe Zyra e Kryeministrit dje e konsideroi këtë akt si target i  dezinformatave ruse.

“Ky incident fatkeq përforcon atë që kemi e ditur prej kohësh: Rusia është e fiksuar pas Kosovës dhe vazhdon ta ketë cak vendin tonë. Gjatë fushatës zgjedhore për zgjedhjet parlamentare të 9 shkurtit, Sputnik Serbia dhe Russia Today (RT) publikuan mbi 60 lajme të rreme dhe artikuj dezinformues, duke ndërhyrë në procesin tonë demokratik, siç dokumentohet nga Misioni i BE-së për Vëzhgimin e Zgjedhjeve”.

Në arsyetimin e incidentit, Qeveria e Kosovës tha se meqë ngjarja ka ndodhur më 11 shkurt, pak pas zgjedhjeve, derisa po pranonin mesazhe urimie “për shkak të kohës” nuk kanë mundur të kryejnë verifikimet e plota dhe kanë rënë në kurthin e komedianëve rusë.

Më 20 mars, Rinkēvičs u prit në Prishtinë nga presidentja e vendit, Vjosa Osmani, me të cilën zhvilloi një takim dhe më pas mbajti një konferencë për media. Po ashtu, gjatë vizitës së trupave letonezë që shërbejnë në Kosovë në kuadër të KFOR-it, ai u takua edhe me komandantin Enrico Barduani. Por, takim s’pati me kryeministrin e Kosovës.

Për mungesën e këtij takimi me Kurtin, Presidenca letoneze i tha Gazetës Express se nuk u ndodhi për shkak se Rinkēvičs zhvilloi një vizitë të shkurtër në Kosovë.

“Kjo ishte një vizitë e shkurtër pune ku presidenti Rinkēvičs u takua me homologen e tij në Kosovë – Presidenten Vjosa Osmani, më pas vizitoi ushtarët e KFOR-it dhe u takua me komandantin Barduani. Takime të tjera nuk ishin planifikuar në këtë vizitë të shkurtër”, thuhet në përgjigje.

Në vizitën e tij në Kosovë presidenti i Letonisë solli mesazhin e shteti të tij për mbështetjen e integrimit të Kosovës bë Bashkimin Europian dhe në Këshillin e Europës.

“Letonia mbetet e përkushtuar për të mbështetur procesin e reformave të Kosovës dhe miraton heqjen e masave kufizuese të BE-së ndaj Kosovës”.

Në konferencën e përbashkët me Osmanin, Rinkēvičs  folir edhe për mospajtimin e tij për masat ndëshkuese të BE-së ndaj Kosovës.

“Duhet të hiqen masat kufizuese, nuk e di nëse do të shënohet përvjetori i dytë i këtyre masave, por qëndrimi i Letonisë është i qartë, masat kufizuese duhet të largohen dhe do ta vazhdojmë të avokojmë për këtë”.