VV-ja e pranon që s`i ka numrat, opozita ia rikonfirmon vijat e kuqe: A mund të shkojë vendi në zgjedhje serish?

Pas takimit të partive politike për seancën përgatitore të 15 prillit, subjekte politike kanë rikonfirmuar qëndrimet e tyre. Lëvizja Vetëvendosje për herë të parë e ka pranuar nuk mund të formojë qeverinë e re vetëm me minoritet jo serbe, kurse opozita ka bërë me dije se për këtë çështje nuk do të bashkëpunojë me partinë e Albin Kurtit.

Partia në pushtet dje e ka ngritur flamurin e bardhë. Numri dy i Lëvizjes Vetëvendosje, Glauk Konjufca, ka bërë me dije se qeveria e re nuk mund të formohet pa bërë koalicion me ndonjërën prej partive opozitare.

Pas takimit që ka pasur me përfaqësuesit e partive politike, në cilësinë e ish-kryetarit të Kuvendit, Konjufca ka theksuar se kjo parti në zgjedhjet e 9 shkurtit nuk e ka arritur synimin e saj.

“Vetëvendosja e ka pas pozicionin transparent gjatë zgjedhjeve. Kemi thënë se qëllimi im ka qenë me vazhdu një qeverisje siç e kemi, mundësisht pa partitë tjera opozitare e pastaj e merr rezultatin e zgjedhjeve edhe e sheh që nuk e ke mbërri atë qëllim. Kjo është demokracia. E ke pas një qëllim dhe nuk ke mbërritur atë. E pastaj e modifikon rrugës. S’është mëkat kjo demokraci. E vendos një qëllim – nuk e kemi arritur. S’i kemi arritur qëllimet dhe tash jemi në skenarin B. Është rasti më normal i mundshëm”, ka thënë Konjufca.

Ai ka vlerësuar se skenari A i LVV-së tani nuk është i mundshëm.

“Kemi thënë qëllimi është ta bëjmë të vetëm qeverinë. A është e mundshme kjo? Mua nuk po më duket e mundshme”, është shprehur ai.

Sipas tij, një koalicion është i pashmangshëm.

“Kur jemi te qeveria është e pamundshme pa e themelu një koalicion, që krijon mazhorancën e aftë me 61 vota, për ta themeluar qeverinë e ri. Unë do ta kisha futur këtu edhe kryetarin e Kuvendit, i nënshtrohen këtij principi”, ka thënë Konjufca.

Pavarësisht shtrirjes se dorës së bashkëpunimit nga VV-ja, partitë opozitare i kanë thënë “jo” bashkëpunimit me VV-në.

LDK-ja dje i është përgjigjur edhe zyrtarisht letrës së Albin Kurtit për takim konsultativ me kryetarin e LDK-së, Lumir Abdixhiku.

Ky i fundit, ka bërë me dije se një takim i tillë nuk është i mundshme.

Në profilin e tij në “Facebook”, ai ka treguar arsyet se pse bashkëpunimi LDK – LVV nuk mund të realizohet.

“Duket se fjalët e thëna e bindjet e ushqyera në vijimësi, nuk kanë peshë njëjtë për të gjithë. Sepse, pavarësisht të gjithë gjërave të thëna, të bëra e stërbëra, dje kam pranuar një letër nga Kryetari i Lëvizjes Vetëvendosje, z. Kurti, për takim konsultativ mes nesh. Sado që unë dhe LDK nuk udhëhiqemi nga inati; sado që ne besojmë në dialog, bashkëpunim e komunikim njerëzor e politik; një takim i tillë – madje edhe konsultativ – do të ishte kapërcim fatal i dinjitetit njerëzor dhe politik. Mes ‘hajvanatit’, ‘mbytjes së LDK-së’, ‘bashkëpunëtorëve të Serbisë’, mes moçalit të madh të pështymave ndaj nesh – unë, LDK dhe votuesit tanë – nuk e gjejmë veten as për konsultim. Sepse fjalët, si edhe bindjet, kanë peshë”, ka shkruar Abdixhiku.

Ai ka theksuar se LDK-ja do të iu mbetet besnike fjalëve të dhënë në fushatë.

“Fjalët e thëna ndaj nesh kanë peshë. Dhe fjalët tona – ato që u kemi dhënë qytetarëve tanë, atyre që nuk joshen nga spektakli i përçarjes por që besojnë se shteti ndërtohet me respekt e dinjitet – kanë peshën e fjalës së dhënë. Peshën e besës. Besë do të ketë! Le të jetë kjo përgjigje e qartë edhe për të tjerët që së fundi, duke marrë peshën që nuk u takon, kanë tentuar t’i tregojnë LDK-së se çfarë duhet të bëjë. LDK – për ta kuptuar mirë – u qëndron besnike vendimeve, bindjeve dhe fjalëve të thëna para fushatës, gjatë fushatës dhe pas fushatës. Ndaj të gjithëve – njësoj”, ka vlerësuar ai.

Edhe nënkryetari i PDK-së, Uran Ismaili, ka kundërshtuar qëndrimin e VV-së se kryeministri i ardhshëm do të jetë Albin Kurti.

Pas takimit që partitë politike kanë pasur me ish-kryetarin e Kuvendit, Glauk Konjufca, ai ka thënë se kryeministri i ardhshëm do të jetë ai që i bën 61 vota.

Ai është shprehur optimist se qeverinë e re do ta formojnë partitë opozitare.

“Unë dëgjova ma herët që po thuhet që dihet emri i kryeministrit, në realitet emrin e kryeministrit e dinë 61 vota. Këtu përfundon”, ka thënë Ismaili.

Kurse, Sekretari i Përgjithsme i AAK-së, Muharrem Nitaj, ka vlerësuar se procesi i formimit të qeverisë po duket i komplikuar.

Në profilin e tij në “Facebook”, ai ka shkruar se rruga për krijimin e qeverisë së re mund të hapet me konstituimin e Kuvendit.

“Tejet i komplikuar procesi i krijimit të qeverisë. Deri me tani nuk ka shenja se VV i ka siguruar numrat e nevojshëm për krijimin e qeverisë. Gjithçka mbetet e hapur për opozitën, e cila si e bashkuar, e ka shumicën, sado që formulë njëkohësisht e komplikuar edhe kjo. Duket që edhe konstituimi i Kuvendit do të jetë një veprim, poashtu i komplikuar. Në mbledhjen e sotme me Kryetarin e Kuvendit, u tha se sipas rregullores, Kuvendi konsiderohet i konstatuar, pasi që të zgjedhen Kryetari dhe pesë nënkryetarët, përfshirë edhe dy nënkryetarët nga radhët e pakicës serbe dhe komuniteteve të tjera jo shumicë”, ka shkruar ai, duke shtuar se VV-ja po dëshiron të dergojë vendin në zgjedhje të reja.

“Sipas kësaj logjike, është e mundur që konstituimi i Kuvendit, të jetë në dorën e Listës Serbe! Krejt po duket se dikush po punon që të bëhët llugë e vendi të shkojë prap në zgjedhje!”, ka shkruar ai.

Shqetësimet e Nitajt ka konfirmuar anëtarja e kryesisë së VV-së, Albulena Haxhiu.

Pas takimit me partitë politike, ajo e ka kërcënuar opozitën me zgjedhje të reja, duke thënë se vendi ka vetëm dy alternativa.

“Ajo që dihet është se kryeministri i ardhshëm do të jetë Albin Kurti, dhe se qeveria shumë shpejt do të votohet. Qeverinë mund ta bëjë VV-ja, por nuk mendoj se mundet opozita si e vetme. Prandaj, ose e bëjmë qeverinë ne, ose shkojmë në zgjedhje. Jemi të interesuar ta bëjmë qeverinë, dhe besoj se qeveria do të bëhet.”, ka thënë Albulena Haxhiu.