Xheneta në gjendje të keqe – e shqetësuar kërkon nga Gjesti që ta lë rehat atë dhe familjen e saj – ja si u kërcënua

Pas një periudhe të gjatë në të cilën ka komentuar rregullisht zhvillimet dhe dinamikat e Big Brother VIP Albania, veçanërisht ato që lidhen me ish-partnerin e saj Gjestin, opinionistja Xheneta Fetahu ka vendosur t’i japë fund çdo diskutimi rreth kësaj çështjeje.

E njohur për qëndrimet e saj të drejtpërdrejta dhe për analizat e sinqerta në emisionin “E Diell” në Top Channel, Xheneta ka bërë një deklaratë të fortë ku bën të ditur se nuk do të flasë më për Gjestin dhe lidhjen që ai ka aktualisht në shtëpinë e famshme.

Në një prononcim të gjatë dhe emocional, ajo ka sqaruar publikisht se gjithçka që ka thënë deri më sot në lidhje me këtë histori, ka qenë thjesht pjesë e punës së saj si opinioniste dhe jo për interesa personale apo hakmarrje.

Megjithatë, sipas saj, kjo nuk është kuptuar nga të gjithë, dhe për fat të keq, reagimet kanë shkuar përtej normales, duke përfshirë edhe sulme personale dhe kërcënime ndaj saj dhe familjes.

“Unë e kam thënë dhe po e përsëris sërish: disa nga njerëzit nuk e kanë kuptuar që unë këtu jam në punë. Unë po flas për herë të parë dhe të fundit në raport me ata dy, për lidhjen që kanë. I uroj vetëm suksese, dhe i them të gjithë rrethit të tij të më lënë të qetë, sepse nuk më kanë lënë as pas Big Brother-it. Njerëzit që punojnë me të… ata e dinë kush e tek,” – është shprehur Xheneta, duke lënë të kuptohet se presioni nuk ka ardhur vetëm nga fansat, por edhe nga persona më pranë Gjestit.

Ajo shtoi se pas përfundimit të Big Brother-it, është përballur me një sërë sulmesh, shqetësimesh dhe kërcënimesh që kanë kaluar përtej kufijve të etikës.

Sipas saj, kjo situatë ka ndikuar thellë në mirëqenien e saj dhe të familjes, të cilët janë ndjerë të rrezikuar për shkak të pjesëmarrjes së saj në diskutime publike.

“Shpresoj që të më lënë mua dhe të gjithë familjen time të qetë. Familja ime ka qenë shumë e shqetësuar gjatë gjithë kohës, për shkak të kërcënimeve që kanë ardhur pse unë vazhdoj të flas për të. Kështu që unë them që vazhdoj të jem këtu për punë të reja dhe jo për të folur më për Big Brother,” – theksoi ndër të tjera ajo, duke dhënë një mesazh të qartë që nuk ka më interes për t’u përfshirë në bisedat që lidhen me ish-partnerin e saj.

Kujtojmë se Xheneta dhe Gjest Gjeka krijuan një lidhje gjatë qëndrimit të tyre në Big Brother VIP Kosova, një romancë që u bë shpejt temë kryesore e diskutimeve dhe që shkaktoi reagime të forta brenda dhe jashtë shtëpisë. Pavarësisht se lidhja e tyre nuk vazhdoi pas përfundimit të spektaklit, ajo mbeti në vëmendje të publikut, sidomos kur Gjest Gjeka mori pjesë në Big Brother VIP Albania dhe krijoi një tjetër lidhje romantike brenda formatit.

Kjo situatë duket se ka riaktivizuar vëmendjen ndaj Xhenetës, e cila nga pozita e opinionistes u pa si një zë me peshë për të komentuar sjelljet dhe zgjedhjet e Gjestit brenda shtëpisë së BBV-së. Megjithatë, për Xhenetën, kjo pjesë ka marrë fund.

Deklarata e saj është një lloj apel për të treguar respekt ndaj privatësisë dhe kufijve personalë, veçanërisht në një kohë kur spektaklet televizive shpesh tejkalojnë kufijtë e ekranit dhe ndërhyjnë në jetën reale të personazheve të përfshirë.

Tani, Xheneta ka vendosur të përqendrohet tek projektet e saj të reja profesionale, duke lënë pas çdo dramë të lidhur me reality show-n që, sipas saj, ka ndikuar negativisht në qetësinë e saj dhe të njerëzve më të afërt./ORAinfo/