Zhvillimi i numrit të urgjencës 142 për dhunën në familje në Zvicër shtyhet deri në maj 2026

Lancimi i numrit të urgjencës 142, i destinuar për të ndihmuar viktimat e dhunës në familje, është shtyrë deri në maj të vitit 2026. Fillimisht ishte parashikuar që numri të vihej në funksion në nëntor të vitit 2025, por vonesat në proces e kanë zgjatur afatin me gjashtë muaj.

Zyra Federale për Komunikim (OFCOM) njoftoi të dielën se “krijimi i kuadrit ligjor të nevojshëm për implementimin e një numri të shkurtër dhe kompleksiteti teknik i projektit kanë sjellë këtë shtyrje”. Kjo deklaratë konfirmon raportin e publikuar nga gazeta Le Matin Dimanche, transmeton albinfo.ch

Një zëdhënës i OFCOM shtoi se “ofruesit e shërbimeve të telekomunikacionit kanë nevojë për më shumë kohë për të përfshirë numrin në rrjetet e tyre”. Përgjegjës për implementimin është Konfederata e Drejtorëve Kantonalë të Çështjeve Sociale (CDAS), në bashkëpunim me kompaninë Swisscom, që është pronare e numrit 142.

“Kemi gatishmëri të ecim përpara,” u shpreh presidenti i CDAS, Matthias Reynard, për gazetën Le Matin Dimanche. Megjithatë, ai sqaroi se për të realizuar këtë hap nevojitet një ndryshim i rregullores nga Këshilli Federal, që duhet të kryhet nga OFCOM.

Rritje shqetësuese e dhunës në familje

Shtyrja e këtij shërbimi vjen në një periudhë kur shqetësimet për numrin e femicideve në Zvicër janë në rritje. Ngjarja e fundit tragjike ndodhi në Epagny (FR), ku një burrë vrau gruan e tij në vendin e saj të punës me një pushkë gjuetie, duke shkaktuar një tronditje të madhe në opinionin publik.

Sipas një grupi që organizoi një marshim heshtje për të kujtuar viktimën e Epagny-t, të paktën 14 femicide janë regjistruar në vitin 2025. Statistikat zyrtare tregojnë se dhuna në familje është rritur me 6.1% gjatë vitit 2024, sipas Zyrës Federale të Statistikave.

Përballë përmasave në rritje të dhunës në familje, Konfederata Zvicerane ka prezantuar një plan veprimi për forcimin e parandalimit. Një linjë telefonike ndihmëse do të jetë në dispozicion deri në fund të vitit 2025, si pjesë e këtij plani.

The post Zhvillimi i numrit të urgjencës 142 për dhunën në familje në Zvicër shtyhet deri në maj 2026 appeared first on Albinfo.