Zvicër: 19% e pensionistëve marrin pension të reduktuar

Numri i pensionistëve të rinj me pension të reduktuar po rritet, duke prekur veçanërisht ata që kanë ndërprerje në historikun e tyre të punës për arsye si emigrimi, studimet, aksidentet apo punësimi i padeklaruar, shkruan Blick.

Sipas analizave të Federatës së Sindikatave, rreth 19% e pensionistëve të rinj kanë boshllëqe në kontributet e tyre, një shifër që është dyfishuar në 15 vitet e fundit. Kjo do të thotë se shumë persona nuk mund të sigurojnë një pension të plotë, çka ndikon ndjeshëm në të ardhurat e tyre mujore. Për çdo vit të humbur kontribute, pensioni ulet me 2.3%, duke shkaktuar një mungesë prej mbi 200 franga në muaj për një pjesë të madhe të të prekurve, përcjell albinfo.ch.

Federata e Sindikatave propozon tre masa kryesore për të adresuar këtë problem:

Deklaratë vjetore e detyrueshme e AHV – çdo person i siguruar të marrë automatikisht një përmbledhje vjetore të kontributeve të tij;

Këshillim falas për punonjësit – krijimi i një shërbimi këshillimi që ndihmon individët të identifikojnë boshllëqet dhe të ndërmarrin veprimet e duhura;

Pagesa e kontributeve të prapambetura – mundësi më fleksibile për të mbuluar boshllëqet e krijuara jo për fajin e individit.

Disa masa po shqyrtohen tashmë nga qeveria zvicerane, duke përfshirë krijimin e një platforme dixhitale për qasje më të lehtë në informacionet e pensioneve. Kjo reformë mund të jetë një hap i rëndësishëm drejt një sistemi më transparent dhe të drejtë për pensionistët e ardhshëm, shkruan Blick.

The post Zvicër: 19% e pensionistëve marrin pension të reduktuar appeared first on Albinfo.