Zvicra duhet të përgatitet për luftë, thotë ish gjenerali amerikan 

Një tërheqje e trupave amerikane nga Evropa është vetëm çështje kohe, beson ish gjenerali amerikan Ben Hodges. Në një intervistë për SonntagsBlick, ish-oficeri këshillon Zvicrën të përgatitet për luftë.

“Mënyra më e mirë për të parandaluar luftën është përgatitja për të”, thotë ish-komandanti i forcave të NATO-s në Evropë. Ata që nuk janë të përgatitur “ftojnë” agresion, shton ai në këtë intervistë të publikuar të dielën, transmeton albinfo.ch.

Sipas tij, Rusia nuk po respekton neutralitetin zviceran. “Kjo nuk do të thotë se tanket ruse do të mbërrijnë ndonjëherë në Zvicër,” shpjegon ai. “Në Detin e Zi dhe atë të Veriut, Moska po zhvillon një luftë hibride duke prishur tregtinë e lirë”.

Gjenerali në pension këshillon ushtrinë zvicerane të mësojë “si të përdorë dhe të zmbrapsë dronët në një shkallë të gjerë”.

Është e nevojshme të investohet masivisht në mbrojtjen ajrore dhe të stërvitet për manovra në shkallë të gjerë.

“Evropa nuk ka më prioritet”

Aktualisht, Departamenti i Mbrojtjes i SHBA-së po financon 100,000 trupa në Evropë, thekson Ben Hodges. Ai beson se është e qartë se Presidenti Donald Trump do të tërheqë trupat e tij. “Pyetja e vetme është kur. Dhe sa trupa do të tërheqë.” “Nga gjithçka që dëgjoj në Uashington, Evropa nuk është më prioritet,” shton ai.

The post Zvicra duhet të përgatitet për luftë, thotë ish gjenerali amerikan  appeared first on Albinfo.