Zvicra me ligj synon të rrisë shpejtësinë e internetit në vend

Këshilli Federal i Zvicrës ka paraqitur një projektligj për zgjerimin e internetit me shpejtësi të lartë në të gjithë vendin, me një buxhet prej 730 milionë frangash. Ky plan synon të sigurojë një shpejtësi minimale shkarkimi prej 1 Gbit/s, duke adresuar sidomos zonat rurale dhe duke shmangur ndarjen dixhitale mes rajoneve urbane dhe periferike, shkruan RTS.

Aktualisht, Zvicra renditet e 26-ta nga 31 vende evropiane për sa i përket mbulimit me fibra optike, ndërsa vetëm një e treta e ndërtesave janë të pajisura me këtë teknologji. Me mbylljen e rrjetit të bakrit, disa zona mund të rrezikojnë shkëputjen nga interneti.

Plani shtatëvjeçar stimulues do të ndihmojë në financimin e rrjetit në zonat ku investimi privat nuk është i qëndrueshëm ekonomikisht. Gjysma e fondeve do të sigurohet nga Konfederata dhe gjysma tjetër nga kantonet, ndërsa shpenzimet federale do të mbulohen nga të ardhurat e licencave të radios celulare pas vitit 2029. Lidhjet e financuara duhet të garantojnë një shpejtësi minimale prej 1 Gbit/s dhe të mos përfitojnë ndihma të tjera, përcjell albinfo.

The post Zvicra me ligj synon të rrisë shpejtësinë e internetit në vend appeared first on Albinfo.