Zvicra tërheq shumë emigrantë, por edhe humb: 60% largohen sërish nga vendi

Rreth 150 mijë njerëz emigrojnë në Zvicër çdo vit, por gati 90 mijë prej tyre e lënë sërish vendin, sipas të dhënave të publikuara nga Zyra Federale e Statistikave (FSO). Këto shifra tregojnë se, pavarësisht jetesës cilësore dhe stabilitetit që ofron, Zvicra përballet me një shkallë të lartë të migrimit të kthimit, shkruan Blick, transmeton albinfo.ch.

Sipas të dhënave të OKB-së, emigrantët përbëjnë 31 përqind të popullsisë në Zvicër, duke e renditur atë mes vendeve me përqindjen më të lartë të emigracionit në botë. Por, siç raporton platforma “Swissinfo”, Zvicra shënon edhe një nga shkallët më të larta të emigrimit krahasuar me vendet e BE-së: 54 persona largohen për çdo 100 që emigrojnë, krahasuar me mesataren evropiane prej 34 për 100.

Arsyet më të zakonshme për largim lidhen me faktorë familjarë, pensionimin jashtë vendit ose vështirësitë profesionale. Mungesa e integrimit, njohja e pamjaftueshme e gjuhëve zyrtare dhe problemet me njohjen e kualifikimeve janë ndër pengesat më të mëdha për ata që synojnë të vendosen në Zvicër, transmeton albinfo.ch.

Një pjesë e madhe e emigrantëve vijnë nga vendet e BE-së, dhe po ashtu përbëjnë shumicën e atyre që largohen. Sipas FSO, shumica e gjermanëve, francezëve, italianëve dhe portugezëve që emigrojnë nga Zvicra kthehen në vendet e tyre të origjinës. Vetëm gjatë vitit 2023, rreth 75% e shtetasve nga Gjermania, Franca dhe Italia që u larguan nga Zvicra ishin kthyer në shtëpi, ndërsa kjo përqindje për shtetasit portugezë ishte edhe më e lartë — afër 87%.

Swissinfo thekson se mosha luan gjithashtu rol të rëndësishëm në këtë vendim: personat në moshë pensioni kanë më shumë gjasë të kthehen në vendlindje, ndërsa të rinjtë mbeten më të prirë për lëvizje të vazhdueshme midis vendeve, transmeton albinfo.ch.

The post Zvicra tërheq shumë emigrantë, por edhe humb: 60% largohen sërish nga vendi appeared first on Albinfo.