Avokati i Popullit në Serbi kërkon hetim për posterët kundër shqiptarëve në Krushevc
Avokati i Popullit në Serbi kërkon hetim për incidentet kundër shqiptarëve
Avokati i Popullit i Serbisë, Zoran Pashaliq, ka kërkuar nga autoritetet gjyqësore të zbardhin menjëherë të gjitha rrethanat lidhur me vendosjen e posterëve me përmbajtje urrejtjeje kundër pjesëtarëve të pakicës kombëtare shqiptare në qytetin e Krushevc.
Në një deklaratë zyrtare, Zoran Pashaliq theksoi se institucioneve përgjegjëse duhet të marrin të gjitha masat e nevojshme për të parandaluar përsëritjen e incidenteve të ngjashme. Ai u bëri thirrje organeve shtetërore që të veprojnë me vendosmëri kundër çdo forme diskriminimi, gjuhës së urrejtjes dhe nxitjes së urrejtjes kombëtare ose etnike.
Thirrja e tij erdhi pasi para një furre buke në pronësi të shqiptarëve në Krushevc u shfaqën mesazhe urrejtjeje me thirrje drejtuar qytetarëve që ta “kujtojnë Gazimestanin” dhe të mos blejnë nga shqiptarët.
Zoran Pashaliq paralajmëroi se veprime të tilla, si vendosja e këtyre posterëve, përbëjnë shprehje të papranueshme të mosdurimit dhe diskriminimit. Sipas tij, posterët e rrezikojnë sigurinën e qytetarëve dhe dëmtojnë besimin ndërmjet komuniteteve.
“Përhapja e urrejtjes dhe mosdurimit ndaj çdo komuniteti kombëtar nuk ka vend në një shoqëri demokratike të bazuar në respektimin e të drejtave të njeriut, barazisë dhe sundimit të ligjit. Çdo qytetar i Serbisë ka të drejtë të jetojë pa frikë nga diskriminimi, frikësimi dhe gjuha e urrejtjes, pavarësisht përkatësisë së tij kombëtare”, deklaroi Zoran Pashaliq.
Ai u bëri thirrje të gjithë qytetarëve, përfaqësuesve të institucioneve, mediave dhe zyrtarëve publikë që të kontribuojnë në ndërtimin e një shoqërie ku respektohen dallimet dhe ku mosmarrëveshjet zgjidhen përmes dialogut dhe mirëkuptimit, e jo përmes gjuhës së urrejtjes dhe thirrjeve për diskriminim.
Më herët, subjekti opozitar në Serbi, Lëvizja e Qytetarëve të Lirë (PSG), kishte kërkuar nga policia dhe prokuroria që pa vonesë të përcaktojnë se kush qëndron pas përgatitjes dhe ngjitjes së posterëve në Krushevc.
Në njoftimin e PSG-së vlerësohet se është veçanërisht e rrezikshme që posteri është ngjitur përpara një furre buke pronari i së cilës është shqiptar, duke theksuar se në këtë mënyrë “njerëz konkretë ekspozohen ndaj presionit, persekutimit dhe dhunës së mundshme”.
“Një mesazh i tillë nuk është qëndrim politik dhe as protestë, por shënjestrim i hapur i njerëzve vetëm për shkak të përkatësisë së tyre kombëtare dhe një përpjekje për ta zhvendosur urrejtjen nga rrjetet sociale në rrugë”, thuhet në reagimin e PSG-së.
Në njoftim thuhet se për çdo vepër penale përgjigjet individi, jo një popull i tërë, dhe se politika e “masave reciproke” ndaj shqiptarëve që jetojnë dhe punojnë në Serbi duhet të refuzohet publikisht dhe të ndalet.
Me pak fjalë
Avokati i Popullit në Serbi, Zoran Pashaliq, ka kërkuar hetimin e posterëve me përmbajtje urrejtjeje kundër shqiptarëve në Krushevc. Ai ka theksuar nevojën për të parandaluar incidente të tilla dhe ka bërë thirrje për respektimin e të drejtave të të gjitha pakicave kombëtare. Subjekti opozitar PSG ka kërkuar gjithashtu që të përcaktohet përgjegjësia për veprën penale.
Personat e përmendur
Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.
