Ballkani Perëndimor dhe marrëdhëniet Kosovë-SHBA në fokusin e takimit Self -Vulaj

Kryetari i Këshillit për Marrëdhëniet Shqiptaro-Amerikane (AARC), Martin Vulaj, ka zhvilluar një takim mëngjesin e sotëm me kongresmenin Keith Self, kryetar i Nënkomisionit për Evropë në Komisionin e Punëve Jashtme të Dhomës së Përfaqësuesve, për një bashkëbisedim të hapur dhe produktiv rreth sfidave me të cilat përballet Ballkani Perëndimor.

Në qendër të bisedës kanë qenë marrëdhëniet ndërmjet Kosovës dhe Shteteve të Bashkuara të Amerikës, ku u theksua rëndësia e njohjes së faktit se, ndërsa partnershipi mes popullit të Kosovës dhe SHBA-së mbetet i fortë, marrëdhëniet ndërqeveritare janë tendosur në mënyrë të panevojshme. Forcimi i kësaj lidhjeje duhet të mbetet prioritet.

Diskutimet prekën gjithashtu polarizimin në rritje në Maqedoninë e Veriut, kërcënimin e vazhduar që Serbia i paraqet rajonit, si dhe rëndësinë e ruajtjes së një pranie të fortë dhe aktive amerikane në Ballkan.

Një vëmendje e veçantë iu kushtua vendimit të afërt nga Dhomat e Specializuara të Kosovës në Hagë. Rezultati do të ketë implikime domethënëse jo vetëm për ata që janë drejtpërdrejt të përfshirë, por edhe për të ardhmen politike të Kosovës, institucionet e saj dhe stabilitetin më të gjerë të rajonit. Është thelbësore që ky proces të vlerësohet përmes parimeve të drejtësisë, procesit të rregullt ligjor dhe realiteteve historike të konfliktit.

Duke u shprehur mirënjohës për kongresmenin Self, kreu i AARC-së vlerësoi udhëheqjen e tij, gatishmërinë për t’u angazhuar rreth këtyre çështjeve kritike dhe angazhimin për të kuptuar realitetet komplekse të Ballkanit.
Shtetet e Bashkuara kanë qenë dhe duhet të mbeten një partner i fortë për paqen, stabilitetin, demokracinë dhe sovranitetin në rajon, ndërsa Këshilli për Marrëdhëniet Shqiptaro-Amerikane do të vazhdojë të punojë me përkushtim për të siguruar këtë vazhdimësi.(B.S/INA)

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.