Dita më vdekjeprurëse në Gaza që prej armëpushimit, Izraeli sulmon pas akuzave ndaj Hamasit

Të paktën 91 persona, mes tyre dhjetëra fëmijë, u vranë nga sulmet ajrore izraelite në Rripin e Gazës mbrëmjen e së martës, duke shënuar ditën më të përgjakshme që prej nisjes së armëpushimit të ndërmjetësuar nga SHBA, raportojnë autoritetet shëndetësore palestineze.

Izraeli nisi valën e bombardimeve pasi akuzoi Hamasin për vrasjen e një ushtari dhe për inskenimin e zbulimit të trupit të një pengu të vdekur. Zyra e kryeministrit Benjamin Netanyahu njoftoi se ai kishte urdhëruar “goditje të menjëhershme dhe të fuqishme” në Gaza.

Hamas e dënoi ofensivën, duke e cilësuar si një shkelje të armëpushimit dhe mohoi akuzat për sulme ndaj trupave izraelite.

Drejtori i spitalit Al-Shifa, dr. Mohammed Abu Salmiya, tha se gjysma e viktimave janë fëmijë dhe e përshkroi situatën humanitare si “katastrofike”, duke theksuar mungesën e barnave dhe furnizimeve mjekësore.

Ushtria izraelite identifikoi ushtarin e vrarë si Rreshter Yona Efraim Feldbaum, 37 vjeç, pjesëtar i njësisë së inxhinierisë luftarake, i cili humbi jetën gjatë luftimeve në jug të Gazës.

Ndërkohë, IDF publikoi një video me dron ku pretendon se tregon militantë të Hamasit duke “inskenuar” gjetjen e trupit të një pengu në prani të Kryqit të Kuq. Organizata ndërkombëtare reagoi duke thënë se nuk ishte në dijeni për ndonjë manipulim dhe e quajti të “papranueshme” një skenë të tillë.

Pas sulmeve, Hamas njoftoi se pezullon dorëzimin e trupit të një pengu që duhej të kalonte përmes Kryqit të Kuq, duke paralajmëruar se çdo përshkallëzim izraelit do të pengojë kërkimet për trupat e pengjeve të tjera.

The post Dita më vdekjeprurëse në Gaza që prej armëpushimit, Izraeli sulmon pas akuzave ndaj Hamasit appeared first on Ditar.al.