Europa në alarm/ Vala ekstreme e të nxehtit thyen rekorde, rritet numri i viktimave

Një valë e fuqishme e të nxehtit po përfshin Europën, duke sjellë temperatura rekord dhe duke shkaktuar qindra viktima, ndërsa autoritetet në disa vende kanë shpallur paralajmërime të nivelit më të lartë.

Polonia, Çekia dhe Sllovakia pritet të përballen me temperatura që kalojnë 40°C, ndërsa mbi 191 milionë banorë në Europë po përjetojnë temperatura mbi 35°C. Në Poloni ekziston mundësia që të thyhet rekordi historik prej 40.2°C, i vendosur në vitin 1921.

Në Çeki, meteorologët paralajmërojnë se temperaturat mund të kalojnë 41°C, duke tejkaluar rekordin kombëtar të vendosur vetëm një ditë më parë. Edhe Gjermania ka regjistruar netët më të nxehta në histori, ndërsa autoritetet në Berlin kanë përdorur topa uji për të freskuar qytetarët dhe kompania hekurudhore Deutsche Bahn ka këshilluar shmangien e udhëtimeve jo të domosdoshme, shkruan A2CNN.

Ndërkohë, Franca ka nisur të numërojë pasojat tragjike të valës së të nxehtit. Autoritetet shëndetësore raportojnë rreth 1,000 vdekje shtesë vetëm gjatë periudhës 24–27 qershor, kryesisht te personat mbi 65 vjeç, por edhe te të rinjtë. Zyrtarët paralajmërojnë se bilanci mund të rritet edhe më tej.

Edhe Spanja ka raportuar të paktën 327 viktima të lidhura me temperaturat ekstreme gjatë javës së fundit.

Përveç vapës përvëluese, pjesë të Francës dhe Belgjikës janë goditur nga stuhi të forta me erëra dhe rrufe, duke shkaktuar përmbytje, ndërprerje të energjisë elektrike dhe viktima. Në Belgjikë, një person humbi jetën pasi një pemë u rrëzua mbi automjetin e tij.

Meteorologët paralajmërojnë se temperaturat ekstreme do të vazhdojnë edhe në ditët në vijim, duke shtuar rrezikun për shëndetin publik dhe duke vënë nën presion shërbimet emergjente në të gjithë kontinentin.

Burimi i lajmit: opinion.al
Shënim: Ky material është përpunuar për qëllime informimi nga Portali Kosova.Today.