Fadil Muqolli: "Kam frikë se po e zbejmë përgjegjësinë e autorëve të krimeve të luftës"
Fadil Muqolli: "Kam frikë se po e zbejmë përgjegjësinë e autorëve të krimeve të luftës"
Një promovim i romanit “Revolta e Syzifit” të autorit Bardhyl Mahmuti, organizuar në Renens të Zvicrës nga Qendra “Gjenocidi në Kosovë, Plagë e Hapur”, u shndërrua në një moment të rëndësishëm reflektimi për dhimbjen, heshtjen dhe përgjegjësinë historike. Në qendër të vëmendjes ishte figura e Fadil Muqollit, protagonist i romanit dhe dëshmitar i drejtpërdrejtë i krimeve të luftës në Kosovë, veçanërisht të Masakrës së Poklekut.
Emocionet e forta, lotët e fshehur dhe heshtja e thellë dominuan sallën gjatë promovimit. Pjesëmarrësit, duke përfshirë edhe shumë të rinj nga diaspora, dëgjuan në heshtje rrëfimet e Fadil Muqollit, i cili përmes fjalëve të tij riktheu kujtimet e dhimbshme të luftës. “Revolta e Syzifit” nuk është thjesht një vepër letrare, por një dëshmi e gjallë e rezistencës dhe mbijetesës së shqiptarëve gjatë një prej periudhave më të errëta të historisë sonë.
Gjatë bisedës me Albinfo, Fadil Muqolli u pyet për mesazhin që do t’i transmetonte brezave të rinj, veçanërisht atyre që jetojnë në diasporë. Përgjigja e tij ishte e qartë dhe prekëse: “Për brezat e rinj që jetojnë jashtë, në diasporë, ju bëj thirrje: asnjëherë mos mendoni të mos jeni shqiptarë. Kudo që shkoni, kudo që veproni, ju shqiptarë do të jeni.”
Por mesazhi i tij nuk u kufizua vetëm në identitetin kombëtar. Fadil Muqolli theksoi edhe një shqetësim të thellë: mungesa e dokumentimit të plotë institucional të krimeve të luftës në Kosovë. “Mos t’i harrojmë këto mijëra jetë njerëzish dhe gjithë këtë gjak. Më brengos fakti që edhe sot nuk kemi një numër zyrtar të viktimave, të grave të dhunuara dhe të të gjitha pasojave të gjenocidit. Kam frikë se me këtë mospunë po e zbehim përgjegjësinë e autorëve të krimeve të kryera gjatë luftës dhe po lëmë në harresë një pjesë të së vërtetës që nuk duhet harruar kurrë”, tha ai, duke ngritur një pyetje të rëndësishme për drejtësinë dhe kujtesën kolektive.
Fjalët e tij krijuan një heshtje të thellë në sallë, duke theksuar se drejtësia nuk arrihet vetëm përmes kujtimit, por edhe përmes dokumentimit dhe përgjegjësisë institucionale. Bardhyl Mahmuti, autor i romanit, theksoi se vepra e tij synon të ruajë kujtesën kolektive dhe të mos lejojë që tragjeditë e së kaluarës të zbehen me kalimin e kohës. Përmes letërsisë, ai përpiqet t’u japë zë atyre që nuk mund të flasin më dhe të mbajë gjallë të vërtetën historike.
Promovimi në Zvicër dëshmoi edhe një herë rolin e rëndësishëm që diaspora shqiptare luan në ruajtjen e kujtesës historike. Për shumë të rinj të pranishëm, ky ishte një takim me historinë përmes dëshmive të drejtpërdrejta, një mundësi për të kuptuar më mirë sakrificat që qëndrojnë pas lirisë së Kosovës.
Në fund të mbrëmjes mbeti një mesazh i qartë: kujtesa nuk është vetëm një detyrim ndaj së kaluarës, por edhe një përgjegjësi ndaj brezave që vijnë. Pikërisht këtë mesazh përcjell “Revolta e Syzifit”, një roman që nuk flet vetëm për një njeri, por për një popull të tërë që refuzon të harrojë.
Me pak fjalë
Promovimi i romanit “Revolta e Syzifit” në Zvicër u shndërrua në një moment emocional dhe reflektues për masakrën e Poklekut dhe krime të tjera të luftës. Fadil Muqolli dhe Bardhyl Mahmuti theksuan rëndësinë e dokumentimit institucional dhe ruajtjes së kujtesës kolektive, duke ngritur shqetësime për mungesën e përgjegjësisë ndaj viktimave të luftës.
Personat e përmendur
Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.
