Gjykata tregtare amerikane bllokon tarifat gjithëpërfshirëse të Trump. Çfarë ndodh tani?

Gkykata tregtare  amerikane ka bllokuar tarifat e gjera të vendosura nga Presidenti Donald Trump, duke e konsideruar këtë një goditje për një nga komponentët kryesorë të politikës së tij ekonomike. Gjykata e Tregtisë Ndërkombëtare, me seli në Manhattan, vendosi se ligji i shpalljes së emergjencës, i cili u përdor nga Shtëpia e Bardhë për të justifikuar tarifat, nuk i jep presidentit autoritetin për të imponuar tarifa të tilla në shumicën e vendeve. Gjykata theksoi se Kushtetuta e SHBA-së i jep Kongresit pushtetin ekskluziv për të rregulluar tregtinë me kombet e tjera.

Kush e solli çështjen në gjykatë?

Vendimi bazohet në dy raste të ndara. Qendra e Drejtësisë Liberty, një organizatë jo-partizane, ngriti një padi në emër të disa bizneseve të vogla që importojnë mallra nga vendet e goditura nga tarifat. Po ashtu, një koalicion shtetesh amerikane sfidoi taksat e importit. Këto ishin paditë e para të mëdha ndaj tarifave të njohura si “Liberation Day”.

Reagimet ndaj vendimit

Administrata Trump ka njoftuar se do të apelonte menjëherë pas vendimit. Zëdhënësi i Shtëpisë së Bardhë, Kush Desai, e kritikoi vendimin, duke thënë se “nuk është për gjykatësit e paemëruar të vendosin se si të adresojnë një emergjencë kombëtare”. Nga ana tjetër, Prokurorja e Përgjithshme e Nju Jorkut, Letitia James, e mirëpriti vendimin, duke theksuar se “ligji është i qartë: asnjë president nuk ka të drejtë të rrisë taksat kurdo që dëshiron”. Ajo shtoi se tarifat përbënin një rritje masive të taksave për familjet dhe bizneset amerikane, të cilat do të kishin sjellë inflacion, dëme ekonomike dhe humbje vende pune nëse do të ishin lejuar të vazhdonin.

Reagimi i tregjeve globale

Pas vendimit, tregjet globale kanë reaguar pozitivisht. Indeksat e aksioneve në Azi janë rritur, duke reflektuar një besim të rinovuar në stabilitetin e politikave tregtare amerikane. Analistët e shohin këtë si një sinjal të forcimit të kontrollit të Kongresit mbi politikën tregtare dhe një kufizim të pushtetit ekzekutiv në këtë fushë.

Ky zhvillim shënon një moment të rëndësishëm në debatin mbi kufijtë e fuqisë ekzekutive dhe kontrollin e Kongresit mbi politikat ekonomike të vendit./abcnews.al