Glauk Konjufca për deklarimin e Vjosa Osmanit: "Takimet në dhomë janë pjesë e negociatave"
Glauk Konjufca për deklarimin e Vjosa Osmanit: "Takimet në dhomë janë pjesë e negociatave"
Nënkryetari i Lëvizjes Vetëvendosje, Glauk Konjufca, ka reaguar ndaj deklaratës së Vjosa Osmanit, e cila kishte thënë se Albin Kurti, së bashku me presidentin e Serbisë, Aleksandar Vuçiq, dhe ish-kryenegociatorin Miroslav Lajçak, kanë qëndruar për orë të tëra në një dhomë të mbyllur gjatë negociatave.
Konjufca, i ftuar në emisionin “Debat Plus” në Dukagjin, ka theksuar se dhomat e negociatave në Bruksel janë pjesë normale e procesit diplomatik, ku zhvillohen takime të gjata në prani të ndërkombëtarëve.
Sipas tij, Vjosa Osmani po përdorë dy tema kryesore në diskursin e saj politik – raportet me SHBA-në dhe Serbinë – për të sulmuar Vetëvendosjen dhe Albin Kurtin. Konjufca ka shtuar se të njëjtin diskurs kanë përdorur edhe partitë opozitare, PDK-ja dhe LDK-ja, por pa sukses zgjedhor gjatë viteve të fundit.
“Ajo është dhoma e Brukselit, e negociatave ku natyrisht që rrihet me orë të tëra e ku janë të gjithë ndërkombëtarët. Por, çfarë është duke ndodh tash është që Vjosa Osmani është duke përdorë dy tema që janë Amerika dhe Serbia. Amerikën po e përdorë siç e ka përdorë PDK-ja dhe LDK-ja që gjashtë vjet po mendojnë me mbrojt Amerikën prej Albin Kurtit pasi po mendojn që Amerika është e rrezikuar dhe këta kanë mbetë me dalë e me mbrojt dhe e dyta me frikësu popullin me Serbinë. Kjo që është më e fuqishme e Vetëvendosjes me Serbinë – krejt ai ndryshim që ka ndodhur në veri sipas saj është iluzion dhe nuk ka ndodhur, të gjitha janë rrena. ‘Ajo që unë e di është shumë e rëndësishme njëfarë gogoli’ – PDK-ja e LDK-ja këtë temë e kanë përdorë që 6 vjet, tri palë zgjedhje i kanë humbur me këto tema dhe të katërtat kanë për t’i humbur”, ka thënë Konjufca.
Ai ka komentuar edhe raportin politik të Osmanit me Kurtin, duke theksuar se ish-presidentja po përpiqet të fitojë mbështetje duke e sulmuar ish-aleatin e saj politik.
“Osmani nuk mundet me fitu vota duke thënë se Albin Kurti është më i miri, ajo po mundohet të fitojë vota duke thënë se Albin Kurti është më i keqi, këtë rrugë e ka zgjedh dhe nuk po e di se kjo rrugë nuk funksionon. Ne jemi ata që kemi qenë më 2021. Albin Kurti është ai i vitit 2021 për të cilin thoshte se është më i miri”, ka shtuar Konjufca.
Me pak fjalë
Glauk Konjufca ka reaguar ndaj deklaratës së Vjosa Osmanit, duke theksuar se takimet në dhomë janë pjesë e negociatave të rregullta në Bruksel. Ai ka akuzuar Osmanin për përdorimin e temave të Amerikës dhe Serbisë për të sulmuar Vetëvendosjen, një strategji që, sipas tij, ka dështuar për partitë opozitare në vitet e fundit.
Personat e përmendur
Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.
