MILANI PO PËRGATIT DIÇKA TË MADHE! Një emër tjetër mund të vijë pas Krosche…
Markus Krösche mund të mos jetë i vetmi që do t’i bashkohet Milanit nga Eintracht Frankfurti. Edhe Timmo Hardung mbetet një opsion për kuqezinjtë, pavarësisht promovimit të tij në strukturën drejtuese të klubit gjerman.
Emri i Markus Krösche është lidhur vazhdimisht me një kalim të mundshëm te AC Milan, ndërsa gjithmonë është përfolur edhe mundësia që bashkë me të në Itali të transferohet krahu i tij i djathtë, Timmo Hardung.
Dyshja ka bashkëpunuar për një kohë të gjatë te Eintracht Frankfurti dhe vlerësohet për punën e bërë në ndërtimin e modelit sportiv të klubit gjerman. Për këtë arsye, Milani ka pasur interes për t’i afruar të dy në projektin e tij të ri.
Megjithatë, së fundmi ky skenar dukej më i vështirë, pasi Hardung është promovuar në një pozitë të rëndësishme brenda strukturës së Frankfurtit, duke marrë rolin që më parë e mbante Krösche, transmeton ORAinfo.
Milani nuk e përjashton transferimin e Hardung
Sipas gazetarit Matteo Moretto, i cili foli në kanalin YouTube të Fabrizio Romanos, mundësia që Hardung të transferohet te Milani mbetet e hapur, pavarësisht konfirmimit të tij në strukturën drejtuese të Eintracht Frankfurtit.
“Pavarësisht mohimeve të Milanit, Krösche do të jetë drejtuesi i ri i futbollit në klub. Dua të sqaroj edhe situatën e mundshme të Timmo Hardung, drejtorit sportiv të Eintracht Frankfurtit. Hardung është krahu i djathtë i Krösche dhe ata kanë punuar së bashku prej kohësh.
Frankfurti e ka konfirmuar atë në strukturën e klubit, por nuk është 100 për qind e sigurt se do të qëndrojë në Gjermani. Milani vazhdon të jetë i interesuar për të, ndërsa Krösche e vlerëson shumë. Nuk mund të përjashtohet mundësia që Milani të bëjë një përpjekje për ta transferuar edhe atë në javët e ardhshme”, deklaroi Moretto.
Gazetari shtoi se Hardung ka disa oferta nga klube të ndryshme, përfshirë Nurnbergun dhe Hannoverin, por opsioni i Milanit duhet të mbahet gjithashtu në konsideratë.
“Krösche do të duhet të përshtatet me një strukturë që tashmë është e konsoliduar, atë të ndërtuar dhe projektuar nga Gerry Cardinale. Megjithatë, nuk e përjashtoj që në muajt e ardhshëm, nëse krijohet mundësia, Milani të tentojë edhe transferimin e Hardung.
Krösche ka respekt të madh për Hardung dhe e konsideron atë një profesionist jashtëzakonisht të përgatitur për rolin e tij”, përfundoi Moretto.
Nëse Gerry Cardinale arrin t’i sjellë të dy drejtuesit në Casa Milan, kjo do të ishte një lëvizje e rëndësishme për projektin sportiv të kuqezinjve.
Për momentin, gjithçka mbetet në nivelin e interesimit dhe spekulimeve mediatike, por mundësia që Krösche dhe Hardung të ribashkohen në Milano vazhdon të jetë e hapur. /ORAinfo/
Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.
