Përplasja tregtare SHBA-Kinë mund të ndikojë edhe tregun e Kosovës

Tregu i Kosovës, i cili mbështetet ndjeshëm në produktet me origjinë nga Kina – që variojnë nga telefonat e mençur e deri te veshmbathjet – mund të ndjejë ndikimet e përplasjeve tregtare mes Shteteve të Bashkuara dhe Kinës. Pas vendimit të SHBA-së për të vendosur një tarifë të lartë prej 104% ndaj produkteve kineze, ekspertët paralajmërojnë pasoja të mundshme edhe për vendet si Kosova, që janë të varura nga importi, shkruan Radio Evropa e Lirë, transmeton albinfo.ch.

Profesori i ekonomisë, Mejdi Bektashi, thekson se këto tarifa mund të nxisin një valë të re inflacioni dhe të detyrojnë kompanitë kosovare të kërkojnë alternativa në tregjet evropiane. “Nga zbatimi i tarifave, barra do të bjerë në fund të zinxhirit, te konsumatorët. Konsumatorët në të gjithë botën, përfshirë ata në Kosovë, do të blejnë produkte kineze deri në 40 për qind më shtrenjtë sesa paguajnë aktualisht”, thotë ai për Radion Evropa e Lirë.

Në anën tjetër, pronari i kompanisë Elkos Group, Ramiz Kelmendi, thotë se do të vazhdojë importin nga Kina, madje pret që çmimet të bien për shkak të tepricave të prodhimit që nuk do të shiten në SHBA.

“Pasi Kina eksporton shumë në tregun e SHBA-së, pas ndikimit të tarifës do të zvogëlohet sasia e produkteve për këtë treg dhe produktet do të orientohen në tregje të tjera. Kina nuk do ta ndalë prodhimin, por do të rritet konkurrenca dhe kjo do ta sjellë uljen e çmimeve për tregjet e tjera”, shprehet Kelmendi, transmeton albinfo.ch.

Kina është ndër partnerët kryesorë tregtarë të Kosovës, duke zënë vendin e tretë për nga importet, me vlerë mbi 748 milionë euro gjatë vitit 2023. Megjithëse dy vendet nuk kanë marrëdhënie diplomatike për shkak të mosnjohjes së pavarësisë së Kosovës nga Kina, bashkëpunimi ekonomik ka mbetur i qëndrueshëm. Eksportet nga Kosova në Kinë mbeten të papërfillshme në krahasim me importin, shkruan REL.

The post Përplasja tregtare SHBA-Kinë mund të ndikojë edhe tregun e Kosovës appeared first on Albinfo.