Përplasje brenda administratës Trump/ Lufta fut në sherr presidentin me të besuarë në krye të inteligjencës

Të shtunën, Drejtoresha e Inteligjencës Kombëtare të SHBA, Tulsi Gabbard, deklaroi se Shtetet e Bashkuara besojnë se Irani mund të ndërtojë një armë bërthamore “brenda javësh apo muajsh”, vetëm disa orë pasi u kritikua nga Presidenti Donald Trump për dhënie të “informacionit të gabuar” — një shenjë e qartë e një përçarjeje midis administratës republikane që tashmë ka dalë në publik.

Në një postim në rrjetin X, Gabbard u shpreh se komentet e saj të mëparshme, në të cilat deklaronte se Irani nuk po ndërtonte një armë bërthamore, ishin nxjerrë “jashtë kontekstit”. Ajo gjithashtu theksoi se pajtohet me qëndrimin e Presidentit se Teherani nuk duhet të lejohet të ndjekë synimet e tij të dyshuara bërthamore.

“Media e pandershme po nxjerr qëllimisht dëshminë time nga konteksti dhe po përhap lajme të rreme për të krijuar përçarje. Amerika ka të dhëna se Irani është në një pikë ku mund të prodhojë një armë bërthamore brenda javësh apo muajsh, nëse vendos të finalizojë montimin. Presidenti Trump ka qenë i qartë se kjo nuk duhet të ndodhë, dhe unë jam dakord,” shkroi Gabbard.

Në mars, Gabbard dëshmoi në Kongres se komuniteti amerikan i inteligjencës vlerësonte se Irani nuk ishte duke ndërtuar një armë bërthamore. “Komuniteti i inteligjencës vazhdon të vlerësojë se Irani nuk është duke ndërtuar një armë bërthamore,” tha ajo atëherë.

Të premten, presidenti Trump deklaroi se Gabbard gaboi kur sugjeroi se nuk kishte prova që Irani po ndërtonte një armë të tillë. “Ajo gabon,” tha ai para gazetarëve.

Kjo ishte hera e dytë brenda javës që Trump hodhi poshtë publikisht vlerësimin e saj. “Nuk më intereson çfarë thotë ajo,” u shpreh ai të hënën, kur u pyet për deklaratat e drejtoreshës së inteligjencës.

Zhvillimet vijnë në një moment kur Shtëpia e Bardhë po shqyrton përfshirjen e saj në përshkallëzimin e konfliktit midis Iranit dhe Izraelit.

Deklaratat e Presidentit Trump janë përputhur më shumë me qëndrimin e Kryeministrit izraelit Benjamin Netanyahu — i cili e konsideron Iranin bërthamor një kërcënim të menjëhershëm — sesa me këshilltaren e tij kryesore të inteligjencës.

Zyrtarët e administratës përpiqen të zbusin përplasjen, duke theksuar se pasurimi i uraniumit mund ta afrojë Iranin me kapacitetin për të ndërtuar një armë. Sidoqoftë, një burim me qasje në raportet e inteligjencës i tha Associated Press se vlerësimi zyrtar nuk ka ndryshuar: shërbimet e spiunazhit amerikan besojnë se Iranit do t’i duheshin deri në tre vjet për të ndërtuar një kokë bërthamore të gatshme për përdorim. / abcnews.al