Pse mungesa e banesave në Zvicër është ndër më të këqijat në Evropë?

Një studim i ri e rendit Zvicrën në vendin e katërt midis vendeve evropiane më të prekura nga mungesa e banesave. Pse është bërë kaq keq dhe a ka ndonjë zgjidhje në horizont?

Pothuajse kushdo që ka kërkuar një vend të përballueshëm për të jetuar në ose përreth qyteteve kryesore të Zvicrës, e di se sa e rëndë është situata në tregun e banesave.

Kjo është konfirmuar në një analizë të re nga kompania e vlerësimit të pasurive të paluajtshme Wüest Partner, e cila krahasoi situatën e banesave në 27 vende evropiane, duke i bazuar gjetjet e saj në variabla si rritja e popullsisë, fuqia blerëse dhe numri i lejeve të ndërtimit të dhëna për projektet e reja të ndërtimit.

Çfarë tregon studimi?

Ai zbuloi se Zvicra renditet ndër performuesit më të keq të Evropës për sa i përket mungesës së banesave, duke e vendosur atë në vendin e katërt.

Vetëm Luksemburgu, Irlanda dhe Norvegjia janë më keq.

Një raport i përditësuar së fundmi nga Zyra Federale e Strehimit tregon gjithashtu se tregu i banesave është “shumë i ngushtë”, veçanërisht në Zvicrën gjermanishtfolëse, ku oferta e banesave është bërë edhe më e rrallë me kalimin e kohës.

Pse Zvicra ia del kaq keq?

Disa faktorë shpjegojnë këtë renditje të zymtë.

Rritja e popullsisë, ndër të tjera, “po përkeqëson situatën”, sipas Wüest Partner.

Kjo nuk është befasi për këdo që ka ndjekur trendet demografike të vendit.

“Zvicra ka qenë në një situatë të rritjes demografike të pandërprerë për disa dekada,” sipas Philippe Wanner, profesor në Institutin e Demografisë dhe Ekonomisë Sociale në Universitetin e Gjenevës.

Kjo rritje është nxitur kryesisht nga konvergjenca dhe ndërvarësia e dy faktorëve: mungesat në tregun zviceran të punës kanë nxitur një kërkesë për më shumë punëtorë të huaj, të cilët, nga ana tjetër, nxisin kërkesën për strehim, shkruan thelocal, përcjell albinfo.ch.

Por ka edhe faktorë të tjerë në lojë

Analiza tregon gjithashtu se në Zvicër nuk po ndërtohen mjaftueshëm banesa të reja.

Së pari, lejet e ndërtimit kanë rënë me 27 për qind gjatë pesë viteve të fundit, “duke e bërë gjithnjë e më të vështirë përmbushjen e kërkesës për banesa të reja”, sipas analizës.

Kjo për shkak se marrja e një autorizimi ndërtimi varet nga pajtueshmëria me legjislacionin mjedisor, i cili rregullon, për shembull, nivelin e zhurmës së lejuar në projektet e banimit.

Pra, për të ndërtuar më shumë dhe për të përmbushur kërkesat, rregulloret strikte si ato që kanë të bëjnë me mbrojtjen nga zhurma duhet të zbuten.

Një tjetër pengesë për ndërtimin, e cila padyshim nuk mund të zgjidhet, është pamjaftueshmëria e tokës, pasi Zvicra është një vend i vogël dhe hapësira për të ndërtuar ndërtesa të reja është e kufizuar.

Si duket e ardhmja?

Jo shumë premtuese, për fat të keq.

Ndërsa rregullat e ndërtimit mund të lehtësohen, nuk ka asnjë mënyrë për të zgjidhur problemin themelor të mungesës së tokës.

Në të njëjtën kohë, popullsia e Zvicrës, tani me pak më shumë se 9 milionë, parashikohet të arrijë shifrën prej 10 milionë disa vite më pas.

Kur saktësisht do të ndodhë kjo nuk është e qartë, me disa ekspertë që parashikojnë vitin 2040, ndërsa të tjerë, si Céline Schmid nga Zyra Federale e Statistikave (FSO), thonë se mund të jetë që në vitin 2034.

Megjithatë, kjo nuk do të thotë se nuk merren fare masa për të zbutur mungesën e banesave.

Trendi i së ardhmes: densifikimi

Siç sugjeron edhe emri, kjo do të thotë se ndërtesat e reja të banimit ndërtohen në afërsi të atyre ekzistuese dhe jo në tokë të lirë.

Zgjidhja e densifikimit është e favorizuar, veçanërisht në qytete si Cyrihu dhe Bazeli, nga Zyra Federale për Zhvillimin Hapësinor (ARE).

Ai thotë se “59 përqind e të gjitha lejeve të ndërtimit për zhvillime banimi përfshijnë projekte në parcela tashmë të ndërtuara. Këto projekte përfshinin, për shembull, ripërdorimin e zonave industriale të mëparshme, zgjerimin e ndërtesave ekzistuese ose rindërtimet. Për sa kohë që një bashki ka pak rezerva zonash ndërtimi, ndërtimi ka më shumë gjasa të bëhet në zonat ekzistuese të banimit.”

The post Pse mungesa e banesave në Zvicër është ndër më të këqijat në Evropë? appeared first on Albinfo.