Zvicra dëbon gruan kurde me dy fëmijët drejt Turqisë, ajo arrestohet menjëherë në Stamboll
Bahar Yalçınkaya, një shtetase turke me origjinë kurde, u dëbua nga Zvicra drejt Turqisë më 4 gusht, pas refuzimit të kërkesës së saj për azil. Menjëherë pas mbërritjes në aeroportin e Stambollit, ajo u arrestua dhe më pas u vendos në paraburgim.
Sipas përfaqësuesit të saj ligjor në Zvicër, Murat Özten, autoritetet turke e akuzojnë Yalçınkayan për “propagandë për një organizatë terroriste”, bazuar në disa publikime në rrjetet sociale.
Në dosjen hetimore përfshihen postime që lidhen me çështjen kurde, urime për Newroz-in, citime letrare, si dhe materiale për gratë kurde që kanë luftuar kundër ISIS-it në Rojava. Avokati pretendon se autoritetet zvicerane ishin në dijeni të procedimeve penale dhe madje edhe të një urdhër-arresti ndaj saj përpara dëbimit.
Sipas tij, vajza 15-muajshe e Yalçınkayas, e lindur në Zvicër, ndodhet me të në burg, ndërsa vajza tjetër, pesëvjeçare, është ndarë nga nëna.
Autoritetet zvicerane, përmes Sekretariatit Shtetëror për Migracionin (SEM), nuk kanë komentuar përmbajtjen e dosjes për shkak të rregullave për mbrojtjen e të dhënave. SEM thekson se çdo rast azili shqyrtohet individualisht dhe sipas praktikës së Gjykatës Administrative Federale.
Sipas kësaj praktike, një hetim në Turqi për “propagandë terroriste” nuk nënkupton automatikisht se personi përballet me përndjekje të tillë që e ndalon dëbimin. Vendimtare janë rrethanat konkrete të secilit rast.
Rasti i Yalçınkayas ka shkaktuar reagime politike në Turqi dhe protesta në Zvicër. Deputeti i partisë pro-kurde DEM, Sezai Temelli, e ka dënuar dëbimin dhe ka akuzuar Zvicrën për shkelje të Konventës së Gjenevës.
Sipas të dhënave të SEM, 113 shtetas turq u kthyen nga Zvicra në Turqi në vitin 2024, 214 në vitin 2025 dhe 88 të tjerë deri në fund të qershorit 2026. Autoritetet zvicerane thonë se nuk kanë të dhëna se sa prej tyre janë arrestuar pas kthimit.
SEM deklaron se po e monitoron situatën në Turqi, por për momentin nuk ka ndryshuar praktikën e saj lidhur me dëbimet.
The post Zvicra dëbon gruan kurde me dy fëmijët drejt Turqisë, ajo arrestohet menjëherë në Stamboll appeared first on Albinfo.
Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.
