13 persona ndalohen për 48 orë, policia jep detaje shtesë rreth aksionit kundër kontrabandës me armë

Një aksion policor që kishte cak kontrabanduesit e armëve u zhvillua mëngjesin e sotëm në 21 lokacione.

Lidhur me këtë operacion organet e rendit kanë dhënë detajet më të reja përmes një komunikate.

Bastisjet u kryen nën udhëheqjen e Drejtorisë për Hetimin e Krimit të Organizuar dhe Krimeve të Rënda, në koordinim me Prokurorisë Themelore të Mitrovicë.

Me këtë rast, 16 persona janë shoqëruar në polici lidhur me dyshimin e kryerjes së veprave penale ‘detyrim’ si dhe ‘importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse’.

Si dëshmi materiale gjatë kontrollit janë sekuestruar 9 armë zjarri, 200 fishekë, municione të ndryshme, 15 telefona mobilë, 2 palë pranga, thikë, tyta të armës, fotrolla për armë dhe 1 DVR.

“Pas intervistimit lidhur me rastin, me vendim të prokurorit, 13 persona shkojnë në ndalim prej 48 orësh”, thuhet në njoftim.

Lokacionet ku u zhvillua aksioni janë: Mitrovicë Jugu, Mitrovicë Veri, Vushtrri, Skenderaj dhe Leposaviq.