Alarm në Zvicër: Nxënësit e arsimit profesional po hasin vështirësi në gjuhë dhe matematikë

Aftësitë bazë në gjuhë dhe matematikë po dobësohen te të rinjtë në Zvicër që ndjekin arsimin dhe formimin profesional, transmeton albinfo.ch.

Kështu rezulton nga një anketë e realizuar nga Economiesuisse, Shoqata Zvicerane e Tregtisë dhe Shoqata Zvicerane e Punëdhënësve, sipas të cilave kompanitë po vërejnë një rënie graduale të njohurive bazë akademike te praktikantët.

Vështirësi në lexim dhe shkrim

Problemet janë veçanërisht të dukshme në lexim, shkrim dhe drejtshkrim. Kompanitë raportojnë se një pjesë e praktikantëve kanë vështirësi në kuptimin e teksteve të gjata dhe në identifikimin e informacionit kryesor.

Edhe përdorimi korrekt i gjuhës, gramatika dhe shkrimi profesional paraqesin sfida.

Vështirësi janë evidentuar edhe në matematikë, sidomos në interpretimin e rezultateve dhe lidhjen e tyre me situata konkrete.

Kërkohet forcimi i arsimit bazë

Përballë kësaj situate, organizatat ekonomike kërkojnë që shkollat të forcojnë mësimin e aftësive themelore në gjuhë dhe matematikë.

Sipas tyre, këto njohuri janë të domosdoshme jo vetëm për suksesin në shkollë, por edhe për përfundimin me sukses të formimit profesional dhe për përballimin e kërkesave të tregut të punës.

Shqetësimi vjen në një kohë kur arsimi profesional është një shtyllë e rëndësishme e sistemit zviceran të përgatitjes së të rinjve për tregun e punës./Albinfo.ch

The post Alarm në Zvicër: Nxënësit e arsimit profesional po hasin vështirësi në gjuhë dhe matematikë appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.