Barcelona apo Reali? Familja e JJ Gabriel ‘vendos’ për të ardhmen e talentit të ri

Momenti i së vërtetës po afrohet në njërin prej transferimeve më interesante të talenteve të reja në Evropë, pasi sulmuesi i talentuar anglez JJ Gabriel, familja e tij dhe agjenti i tij pritet ta zbulojnë destinacionin përfundimtar brenda pak ditësh.

Koha e tij te Manchester Unitedi ka përfunduar. Gjigantët evropianë po luftojnë mes vete për ta siguruar shërbimin e tij.

Gazeta spanjolle “Sport” ka raportuar se 16-vjeçari ka oferta zyrtare nga Real Madridi dhe Barcelona, dy klubet që konsiderohen favorite për nënshkrimin e tij, përpara Paris Saint-Germainit dhe Bayern Munichut.

Personat e afërt me Gabrielin i kanë konfirmuar gazetës katalunase se vendimi përfundimtar do të bëhet i ditur brenda pak ditësh dhe se situata aktuale ka filluar të krijojë shqetësim te të gjitha palët.

Çdo ditë, mesfushori i talentuar stërvitet i vetëm në Castelldefels, duke pritur një zgjidhje për të ardhmen e tij dhe një licencë të re për të luajtur.

Ai tashmë ka siguruar një pasaportë të Bashkimit Evropian përmes familjes së tij, duke i tejkaluar kështu pengesat e fundit ligjore.

Raportimet e paraqesin Real Madridin si klubin më pranë për ta përmbyllur marrëveshjen.

Klubi spanjoll i ka pranuar të gjitha kushtet e përcaktuara nga lojtari dhe agjenti i tij i njohur, Ali Barat, ndërsa do t’i mbulojë të gjitha shpenzimet, të cilat vlerësohen në 10 milionë euro.

Oferta e tyre përfshin një kontratë trevjeçare, bonuse të ndryshme për anëtarët e familjes së lojtarit dhe agjentin e tij, shpërblime të lidhura me paraqitjet dhe përmbushjen e plotë të kërkesave të tij sportive.

Te Barcelona, situata është më e ndërlikuar. Drejtori sportiv Deco ka këmbëngulur prej ditësh se refuzon të hyjë në negociata, duke pranuar vetëm se Barat e kishte ngritur çështjen e lojtarit gjatë turneut të tij në Evropë.

Megjithatë, personat e afërt me Gabrielin vazhdojnë të theksojnë dëshirën e tij për t’iu bashkuar Barcelonës, nëse plotësohen kushtet e tij.

Duke iu referuar faqes “The Touchline”, gazeta ka raportuar edhe shifrat e ofertës së mundshme të Barcelonës: një pagë prej rreth dy milionë eurosh për tri sezone, në përputhje me rregulloret për lojtarët 16-vjeçarë dhe një shumë e pazakontë për këtë grupmoshë, si dhe ndihma financiare për familjen dhe bonuse të lidhura me paraqitjet.

Në Gjermani, një takim mes drejtorit sportiv Max Eberl dhe Ali Barat e çoi Bayern Munichun në një përfundim: kostoja financiare ishte tepër e lartë dhe klubi nuk mund ta përballonte pa prishur ekuilibrat e brendshëm. Ata shprehën interesim dhe u ndalën me kaq, pa paraqitur asnjëherë ofertë zyrtare.

Pozicioni i Paris Saint-Germainit është më i paqartë, ndonëse burime i kanë konfirmuar gazetës “Sport” se klubi parisien e dinte që lojtari dëshironte ta vazhdonte karrierën në Spanjë, konkretisht te Barcelona ose Real Madridi.

Gabriel dhe njerëzit e tij kanë vendosur të ruajnë sekret të plotë në Castelldefels gjatë fazës përfundimtare të negociatave. Asnjë deklaratë dhe asnjë publicitet rreth vizitave të detyrueshme te klubet e ndryshme. Kjo shënon një ndryshim thelbësor në strategjinë e tyre, me synimin për ta mbajtur larg vëmendjen e mediave, veçanërisht në një kohë kur po përballen me kritika të shumta dhe pakënaqësinë e Manchester Unitedit lidhur me mënyrën se si po largohet talenti i tij i madh.

Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.