Dibra e Madhe nderon me titullin “Qytetar Nderi” Arbër Hajdarin, Ali Ahmeti: Hero i paqes dhe i humanizmit

Arbër Hajdari, një nga figurat publike më të njohura të përkushtuar ndaj humanizmit, është nderuar me titullin e lartë “Qytetar Nderi” në Maqedoninë e Veriut.

Në një ditë të veçantë për Dibrën, kur u inaugurua përfundimisht Rruga e Arbrit, u festua Dita e Verës, si dhe në një muaj të shenjtë Ramazani, u zgjodh të nderohet kontributi i tij në ndihmë të mijëra familjeve shqiptare.

“Dibra ka një arsye më shumë për të festuar, jo vetëm që u hap tuneli i Murrizit, por sot nderojmë një njeri që ka bërë ndryshim të madh për njerëzit në nevojë. Arbër Hajdari nuk është vetëm një emër por simbol i solidaritetit, ndihmës dhe besimit se së bashku mund të bëjmë më shumë për njëri tjetrin”, tha Hekuran Duka- kryetar komuna e Dibrës.

Veprimtaria e Arbër Hajdarit përmes Fondacionit “Fundjavë Ndryshe” me misionin për të ndryshuar vullnetarisht jetët e njerëzve në nevojë duke sjell shpresë për ta, u vlerësua në një ceremoni emocionuese të mbushur me mirënjohje në Dibër, por ky nuk është çmimi i vetëm që meriton sipas të ftuarve.

“I morët radhën shoqatës Tirana, se kishim kohë që ishim përgatitur për ti dhënë titullin tonë si shoqatë ne e kemi ‘fisnikëria tiranase’. Ky është titulli më i lartë që ka shoqata jonë. Nëse ka një njeri që i rri shumë mirë ky titull është Arbri”, u shpreh Rruzhdi Keçi- kryetar i shoqatës Tirana.

Të shumtë ishin personalitetet të cilët e cilësuan Arbërin frymëzim dhe modelin e munguar për të rinjtë anembanë shqiptarisë.

“Një medalion i rinisë shqiptare e merr këtë titull në një moshë fare të re sepse vullnetarizmi dhe humanizmi si vlera universale të njeriut e bëjnë Arbër Hajdarin shembull të rinisë shqiptare”, deklaroi Ulsi Manja.

“Heronj janë ata që bien për atdhe. Ti je sot heroi i paqes, hero i humanizmit sepse kështu e filloi Nënë Tereza dhe sot është e shenjtë. Ti bën punë të mëdha pa interes personal, por në ndihmë të njerëzve të pamundur të cilët janë kategoria më e ndjeshme e shoqërisë”, tha Ali Mehmeti.

I rrethuar nga duartrokitjet dhe vlerësimi, Arbri shprehu falënderimet e tij, duke çmuar marrjen e titullit jo thjesht si një nderim por edhe një përgjegjësi për të mos ndaluar me misionin e tij humanitar sepse ky moment dëshmon se e mira fiton gjithmonë.

“Marrja e titullit si qytetar nderi i komunës Dibër është nder i jashtëzakonshëm. Jo vetëm për mua si individ, por për të gjithë ata që besojnë në fuqinë e të mirës dhe solidaritetit. Ky çmim sot nuk më përket vetëm mua, por edhe atyre njerëzve të ndershëm që na kanë mbështetur në çdo hap të rrugëtimit tonë. Nëpërmjet punës sonë me Fundjavë Ndryshe kam pasur privilegjin të shoh me sytë e mi fuqinë e jashtëzakonshme të solidaritetit. Kur njerëzit bashkohen: mrekullitë ndodhin!”, deklaroi Arbër Hajdari- Fundjavë Ndryshe.

The post Dibra e Madhe nderon me titullin “Qytetar Nderi” Arbër Hajdarin, Ali Ahmeti: Hero i paqes dhe i humanizmit appeared first on