Dritë e gjelbër për modernizimin e EuroAirport, mbi 157 milionë euro investime

Qeveritë e kantoneve Basel-Stadt dhe Basel-Landschaft, si dhe autoriteti francez i aviacionit civil, DGAC, kanë miratuar zgjerimin e terminalit të EuroAirport Basel-Mulhouse-Freiburg.

Projekti, me vlerë mbi 157 milionë euro, synon modernizimin e infrastrukturës dhe përmirësimin e shërbimeve për udhëtarët. Financimi do të mbulohet tërësisht nga aeroporti, shkruan Swissinfo.ch, transmeton albinfo.ch.

Sipas njoftimit të autoriteteve kantonale të 27 tetorit, terminali ka prej kohësh nevojë për një modernizim të plotë. Ndërhyrjet përfshijnë një sallë të re hyrëse, hapësira shtesë në zonën e hapur për publikun dhe rinovime në ndërtesën ekzistuese. Qëllimi është lehtësimi i procedurave për pasagjerët dhe përmirësimi i kushteve gjatë qëndrimit në aeroport.

Projekti parashikon ndërtimin e një objekti të ri prej rreth 14 mijë metrash katrorë në anën lindore të terminalit dhe rinovimin e rreth 15 mijë metrave katrorë në ndërtesën aktuale. Kontrollet e sigurisë do të përqendrohen në një ndërtesë të vetme, ndërsa lëvizja e pasagjerëve do të bëhet më e thjeshtë dhe më e kuptueshme. Do të riorganizohet edhe qasja rrugore në terminal dhe do të përmirësohen hapësirat e gastronomisë dhe dyqaneve pa taksa.

Autoritetet theksojnë se zgjerimi nuk krijon kapacitete shtesë për shërbimin e avionëve. Në qendër të investimit janë infrastruktura ekzistuese, efikasiteti i punës dhe cilësia e shërbimeve për udhëtarët e vizitorët. Projekti parashikon gjithashtu standarde të larta mjedisore gjatë ndërtimit dhe funksionimit të terminalit. Kanton Basel-Stadt

Punimet planifikohen të fillojnë në tremujorin e tretë të vitit 2027 dhe të përfundojnë drejt fundit të vitit 2031.

The post Dritë e gjelbër për modernizimin e EuroAirport, mbi 157 milionë euro investime appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.