Egjipti i thotë ‘jo’ propozimit/ Refuzon të marrë përsipër administrimin e rripit të Gazës

Egjipti ka refuzuar propozimin e liderit të opozitës izraelite, Yair Lapid, për të marrë përsipër administrimin e Rripit të Gazës pas përfundimit të luftës midis Izraelit dhe Hamasit.

Ky propozim është cilësuar nga Egjipti si “i papranueshëm” dhe në kundërshtim me qëndrimin egjiptian dhe arab për çështjen palestineze. Zëdhënësi i Ministrisë së Jashtme egjiptiane, Tamim Khalaf, theksoi se çdo ide që anashkalon qëndrimet e Egjiptit dhe botës arabe për Gazën do të refuzohet.

Lapid propozoi që Kajro të marrë kontrollin e Gazës për tetë vjet si një mënyrë për të lehtësuar borxhin, pasi të përfundojë lufta. Megjithatë, Egjipti e cilësoi këtë propozim si një “gjysmë masë” që mund të vazhdojë të zgjasë konfliktin dhe të minojë mundësinë e një zgjidhjeje të qëndrueshme. Khalaf theksoi gjithashtu se Rripi i Gazës dhe Bregu Perëndimor janë të pandashëm dhe se ata duhet të jenë nën sovranitetin dhe administrimin e plotë të palestinezëve, duke përfshirë Jeruzalemin Lindor, i cili është i pushtuar nga Izraeli që nga viti 1967.

/ abcnews.al