FOTOLAJM/ Aeroplani rrëzohet në San Diego, 15 shtëpi përfshihen nga flakët

Një aeroplan i vogël është rrëzuar në një lagje të San Diegos, duke shkaktuar dëme të mëdha materiale. Autoritetet kanë konfirmuar se përplasja ka qenë një “goditje e drejtpërdrejtë ndaj disa shtëpive”, duke përfshirë në flake të paktën 15 banesa dhe automjete në zonë.

Ngjarja ndodhi në kushte të rënda atmosferike, ku mjegulla e dendur ka vështirësuar pamjen. “Nuk mund të shihje asgjë përpara vetes,” u shpreh ndihmës shefi i zjarrfikësve, Dan Eddy. Ai shtoi se zona ku ndodhi përplasja është e mbuluar me karburant avioni dhe se prioriteti kryesor i shërbimeve emergjente është evakuimi i banorëve dhe kontrolli i çdo banese të prekur.

Pamjet nga vendngjarja tregojnë një fushë të madhe rrënojash dhe tym të dendur, ndërsa ekipet e zjarrfikësve punojnë për të vënë flakët nën kontroll. Banorët e disa blloqeve janë evakuuar për arsye sigurie, ndërsa për momentin nuk ka informacion të saktë mbi numrin e të lënduarve apo viktimave të mundshme.

Autoritetet kanë nisur një hetim për të përcaktuar shkaqet e aksidentit, ndërsa ende nuk dihet se sa persona ndodheshin në bord në momentin e përplasjes.