Fshati Blatten shkatërrohet nga shembja e akullnajës Birch, 1 person rezulton i zhdukur

Një ngjarje e rëndë ka goditur fshatin Blatten në rajonin Lötschental të Zvicrës. Të mërkurën pasdite, një pjesë e madhe e akullnajës Birch është shembur, duke shkaktuar një rrëshqitje masive dheu që ka shkatërruar pjesën më të madhe të fshatit në Valais-in e Epërm. Mbeturinat kanë bllokuar gjithashtu lumin Lonza.

Sipas autoriteteve, një person rezulton i zhdukur pas katastrofës. Fshati ishte evakuuar paraprakisht më 19 maj si masë paraprake, për shkak të rritjes së rrëshqitjeve ditët e fundit, transmeton albinfo.ch.

Banorët janë të tronditur, pasi shumë prej tyre kanë humbur gjithçka. Ata kishin vetëm rreth njëzet minuta kohë për të mbledhur sendet personale përpara se të largoheshin nga shtëpitë e tyre.

Këshilli i Shtetit ka shpallur situatën si një gjendje të jashtëzakonshme. Forcat e ndërhyrjes ndodhen në terren për të vlerësuar gjendjen dhe për të planifikuar hapat e mëtejshëm.

Situata mbetet kritike, ndërsa autoritetet po punojnë intensivisht për të garantuar sigurinë dhe për të kërkuar personin e zhdukur.

The post Fshati Blatten shkatërrohet nga shembja e akullnajës Birch, 1 person rezulton i zhdukur appeared first on Albinfo.