“Kur e kemi parë publikimin jemi befasuar”, Anton Quni flet për postimin e Hotit ku kërkoi lidership të ri në LDK

Anton Quni nga Lidhja Demokratike e Kosovës ka thënë se janë befasuar me postimin e Avdullah Hotit ku kërkoi lidership të ri në LDK.

Quni tha se në mbledhjen e kryesisë, Hoti kishte vërejtje vetëm për votat e diasporës, por jo edhe për rezultatin e përgjithshëm.

Ai ka thënë se më mirë do të ishte që Hoti të shtronte çështjet në kryesi, sesa në publik.

“Hoti nuk ka shfaqur brenda kryesisë ndonjë pakënaqësi, ka pasur pakënaqësi në lidhje me votat nga diaspora. Lidhje me performancën e LDK-së, rezultatin e përgjithshëm, nuk ka pasur vërejtje të veçantë. Kur e kemi parë publikimin jemi befasuar, pse do të duhej të trajtohej në publik kur ka qenë mundësitë të trajtoheshin brenda kryesisë”, ka thënë Quni në T7.