Kurti nuk do president nga LDK, por koncensual, kreu i VV flet pas takimit

Kryetari i Lëvizjes Vetëvendosje, Albin Kurti, ka deklaruar se ende nuk është arritur një marrëveshje politike me Lidhjen Demokratike të Kosovës, duke vlerësuar se ekziston një dallim i madh mes rezultatit që LDK-ja ka marrë në zgjedhjet e 7 qershorit dhe kërkesave që po paraqet në negociata.

“Marrëveshje politike nuk e kemi ende, pritjet janë të ndryshme, qëndrimet nuk përputhen dhe është bindja ime që ka një dallim drastik mes rezultatit zgjedhor dhe kërkesave të LDK-së”, është shprehur Kurti.

Ai ka theksuar se, sipas tij, ekziston një shpërputhje mes ambicieve të LDK-së dhe rezultatit që kjo parti ka arritur në zgjedhje.

“Në këtë situatë ku kemi ambicie, apetite që LDK ta ketë presidentin ndonëse e dini që për ta aplikuar për president nevojiten 30 nënshkrime, për tu zgjedhur duhet 61. Ka shpërputhje të madhe mes rezultatit dhe ambicieve”, është shprehur Kurti.

Kurti ka deklaruar se asnjëherë presidenti nuk ka qenë nga opozita dhe se preferenca e parë e Lëvizjes Vetëvendosje mbetet zgjedhja e një presidenti konsensual.

“Por nëse nuk ka president konsensual dhe nëse vijmë te presidenti partiak atëherë është Lëvizja Vetëvendosje, parti për parti jemi ne. Ne i kemi 53 deputetë, e tre të tjerë së bashku gjithsej bëjnë 47. Le të mos zgjedhim president partiak, të shkojmë me një figurë akademike, profesionist të dëshmuar, por nëse kjo refuzohet në mënyrë kategorike, atëherë kur shkojmë te subjektet politike para së gjithash e mbi të gjithash, fituesi i zgjedhje që nuk është fitues i zakonshëm i zgjedhjeve, në këtë situatë e kemi të pamundur të bëjmë marrëveshje politike që e deformojnë rezultatin zgjedhor”, ka theksuar Kurti.

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.