Prishtina lidh kontratë 300 mijë euro për rrënimin e objekteve pa leje, 30 euro ora për punëtorët fizikë
Komuna e Prishtinës ka lidhur një kontratë publike kornizë në vlerë indikative prej 300 mijë eurosh për rrënimin e objekteve pa leje. Dokumentet e kontratës zbulojnë çmime të ndryshme për angazhimin e makinerive, punëtorëve fizikë dhe kryerjen e punimeve të tjera.
Në mesin e tyre figuron edhe tarifa prej 30 eurosh për orë për angazhimin e punëtorëve fizikë.
Komuna e Prishtinës ka nënshkruar një kontratë publike kornizë për rrënimin e objekteve pa leje, e cila mund t’i kushtojë buxhetit komunal deri në 300 mijë euro, sipas vlerës indikative të përcaktuar në dokumentin kontraktual.
Kontrata me numër prokurimi 616-26-3546-5-2-1, e titulluar “Rrënimi i objekteve pa leje në Komunën e Prishtinës”, është lidhur me grupin e operatorëve ekonomikë “Dardania” SH.P.K. dhe “Clean Work Sh.P.K.”, me datë 10 shtator 2026. (DOKUMENT)
Nga shqyrtimi i dokumenteve kontraktuale, Kujdestari.info ka identifikuar disa çmime dhe pozicione që ngrenë pikëpyetje për arsyeshmërinë ekonomike dhe mënyrën se si do të kontrollohen shpenzimet gjatë zbatimit të kontratës.
Një prej tyre është angazhimi i punëtorëve fizikë, për të cilin është përcaktuar çmimi prej 30 eurosh për orë.
Sipas përshkrimit të pozicionit në listën e çmimeve, këta punëtorë do të angazhohen për ngarkimin dhe shkarkimin e materialeve, bartjen e tyre, punët me lopatë dhe përdorimin e mjeteve të ndryshme të punës.
Megjithatë, dokumenti nuk e sqaron shprehimisht nëse çmimi prej 30 eurosh për orë përllogaritet për një punëtor të vetëm apo për një ekip punëtorësh.
Nëse tarifa zbatohet për një punëtor, angazhimi i tij për tetë orë do të kushtonte 240 euro, ndërsa angazhimi i pesë punëtorëve për një ditë pune tetëorëshe do të arrinte në 1,200 euro.
Çmime të ndryshme për makineritë dhe punimet
Lista e çmimeve përfshin edhe shërbime të tjera që do të përdoren gjatë rrënimit të objekteve.
Për angazhimin e miniekskavatorit është përcaktuar çmimi prej 20 eurosh për orë, ndërsa për ekskavatorin demolues BROKK çmimi është 35 euro për orë.
Në dy pozicione të veçanta, angazhimi i ekskavatorëve të pajisur me mjete për rrënim është përcaktuar me çmim prej 75 eurosh për orë.
Ndërkohë, për angazhimin e vinçit mobil është përcaktuar çmimi prej 100 eurosh për orë.
Në pjesën e punimeve ndërtimore, kontrata përmban çmime prej 30 eurosh për metër katror për disa punime murature, 65 euro për metër kub për betonim dhe 80 euro për metër katror për punët që lidhen me materialet me përmbajtje azbesti.
Kontratë 300 mijë euro, por sasitë e punëve nuk dihen
Në listën e çmimeve, pozicionet janë paraqitur me sasi indikative prej një njësie. Shuma e çmimeve të listuara është 624 euro, ndërsa vlera totale indikative e kontratës është 300 mijë euro.
Komuna nuk mund ta dijë paraprakisht numrin e saktë të objekteve pa leje që do të rrënohen, përmasat e tyre apo llojin e makinerive dhe punëtorëve që do të nevojiten.
Në praktikë, autoriteti kontraktues mund të ketë nevojë të porosisë vetëm disa prej shërbimeve të listuara, ndërsa pozicionet e tjera mund të mos përdoren fare.
Kjo krijon rrezikun që një ofertë me çmime të ulëta në disa pozicione dhe çmime më të larta në pozicione të tjera të rezultojë ekonomikisht më e kushtueshme gjatë realizimit të kontratës, varësisht nga shërbimet që porositen.
Një praktikë e tillë njihet si ofertim i pabalancuar dhe përbën një rrezik që duhet vlerësuar në prokurimet me sasi të paparashikueshme.
Pozicione të ngjashme, rrezik për mbivendosje të faturimit
Nga shqyrtimi i listës së çmimeve vërehen edhe pozicione me përshkrime të ngjashme.
Angazhimi i punëtorëve fizikë paraqitet në më shumë se një pjesë të listës, ndërsa disa shërbime të makinerive janë përshkruar me karakteristika të përafërta.
Kjo është veçanërisht e rëndësishme në rastet kur një punim mund të përfshijë njëkohësisht makineri, operatorë të makinerive dhe punëtorë fizikë. /Kujdestari.info/
Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.
