Pse po qëndrojnë më pak turistë në hotelet e Zvicrës?

Hotelet në Zvicër kanë regjistruar rënie të numrit të netqëndrimeve gjatë muajit gusht, pas rritjes së lehtë të shënuar në korrik. Sipas Zyrës Federale të Statistikave (BFS), gjatë gushtit 2026 u regjistruan rreth 4.88 milionë netqëndrime, 2.1 për qind më pak krahasuar me të njëjtin muaj të vitit 2025, përcjell albinfo.ch.

Rënia ka përfshirë të dy kategoritë e mysafirëve. Netqëndrimet e turistëve nga jashtë vendit kanë rënë për 2.6 për qind, ndërsa ato të mysafirëve nga Zvicra për 1.5 për qind.

Një nga faktorët që po ndikon në këtë zhvillim është konflikti në Lindjen e Mesme, i cili ka shkaktuar pengesa në disa prej linjave të rëndësishme ajrore ndërkombëtare. Kjo ka ndikuar veçanërisht në udhëtimet nga Azia, përfshirë Indinë, Kinën, Azinë Juglindore dhe shtetet e Gjirit.

Për shkak të ndërprerjeve në itineraret ajrore përmes qendrave të mëdha të fluturimeve, si Dubai, Abu Dhabi dhe Doha, numri i turistëve nga këto rajone që vizitojnë Zvicrën ka shënuar rënie.

Rënie e ndjeshme e mysafirëve nga Azia

Të dhënat për periudhën janar–gusht 2026 tregojnë se hotelet zvicerane regjistruan gjithsej 30.2 milionë netqëndrime, 0.7 për qind më pak se në të njëjtën periudhë të vitit rekord 2025.

Gjatë këtyre tetë muajve, netqëndrimet e mysafirëve nga jashtë vendit ranë për 2.2 për qind, në 15.5 milionë. Rënia ishte veçanërisht e theksuar te turistët nga India, me 23 për qind, nga shtetet e Gjirit, me 16 për qind, dhe nga Kina, me afro 7 për qind.

Në të kundërt, kërkesa vendase ka shënuar rritje në bilancin e tetë muajve të parë të vitit. Netqëndrimet e mysafirëve zviceranë u rritën për 0.9 për qind, duke arritur në 14.6 milionë.

Gjermania dhe SHBA-ja ndër tregjet kryesore të huaja

Sipas të dhënave të publikuara për gushtin, Gjermania dhe Shtetet e Bashkuara vazhdojnë të jenë ndër tregjet më të rëndësishme të turizmit të huaj për hotelet zvicerane.

Gjatë muajit u regjistruan 485.922 netqëndrime nga mysafirët gjermanë dhe 444.978 nga ata amerikanë. Pas tyre renditen Franca me 209.824 netqëndrime dhe Mbretëria e Bashkuar me 197.636.

Ndërkohë, mysafirët nga Kina regjistruan 95.795 netqëndrime, ndërsa nga Italia u shënuan 118.587.

Pas rritjes së lehtë në korrik, shifrat e gushtit tregojnë një dobësim të aktivitetit hotelier në Zvicër, ndërsa ndikimi i zhvillimeve ndërkombëtare dhe ecuria e kërkesës vendase mbeten faktorë të rëndësishëm për sektorin turistik./Albinfo.ch

The post Pse po qëndrojnë më pak turistë në hotelet e Zvicrës? appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.