UBS shënon 2,7 miliardë dollarë fitim në tremujorin e tretë

Banka më e madhe zvicerane, UBS, ka raportuar fitim neto prej 2,69 miliardë dollarësh për tremujorin e tretë të vitit 2026, rreth 8 për qind më shumë se në të njëjtën periudhë të vitit të kaluar. Rezultati i publikuar më 28 tetor ishte afër pritjeve të analistëve, të cilët parashikonin fitim prej 2,71 miliardë dollarësh, raporton Reuters, transmeton albinfo.ch.

Një shtysë të rëndësishme dha sektori i menaxhimit të pasurisë, i cili tërhoqi rreth 55 miliardë dollarë mjete të reja neto nga klientët. Prej tyre, rreth 18 miliardë erdhën nga Azia dhe 17 miliardë nga kontinenti amerikan, ku banka përmirësoi edhe përfitueshmërinë.

Sipas njoftimit të UBS-së, integrimi i Credit Suisse po ecën sipas planit dhe pritet të përfundojë në pjesën më të madhe deri në fund të vitit 2026. Banka tashmë ka realizuar ulje kumulative bruto të kostove prej 13,2 miliardë dollarësh dhe synon që kjo shifër të arrijë në 13,7 miliardë deri në fundvit, mbi objektivin e mëparshëm prej rreth 13,5 miliardësh.

Gjatë tremujorit, numri i punonjësve u zvogëlua me pothuajse 1.500 vende pune me orar të plotë. Ndërkohë, raporti ndërmjet kostove dhe të ardhurave ra nga 77 në 72,3 për qind, duke treguar se një pjesë më e vogël e të ardhurave përdoret për shpenzimet operative. investing.com

UBS vazhdoi edhe riblerjen e aksioneve të veta, me 1,8 miliardë dollarë gjatë tremujorit. Banka synon ta përmbyllë programin prej 3 miliardë dollarësh deri në publikimin e rezultateve të tremujorit të katërt, në shkurt 2027. Megjithatë, ritmi i riblerjeve mbetet i lidhur me ecurinë financiare dhe qartësimin e kërkesave të ardhshme zvicerane për kapitalin bankar.

The post UBS shënon 2,7 miliardë dollarë fitim në tremujorin e tretë appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.