Tensione në jug të Libanit/ Izraeli vret 15 persona teksa banorët tentonin të ktheshin në shtëpitë e tyre

Forcat izraelite vranë 15 persona në jug të Libanit këtë të dielën, ndërsa mijëra banorë po mundoheshin të ktheheshin në shtëpitë e tyre, duke shkelur urdhrat izraelitë.
Izraeli njoftoi se do të mbante trupat e tij në jug përtej afatit të armëpushimit të ndërmjetësuar nga SHBA, duke akuzuar Libanin për moszbatimin e kushteve për largimin e armëve të Hezbollahut dhe vendosjen e ushtrisë libaneze.

Ushtria libaneze, e mbështetur nga SHBA, e akuzoi Izraelin për vonesa në tërheqje. Konflikti Hezbollah-Izrael ka shkaktuar shpërnguljen e mbi një milion njerëzish dhe ka lënë Hezbollahun të dobësuar.

Ministria e Shëndetësisë së Libanit tha se 15 persona u vranë dhe 83 u plagosën gjatë sulmeve izraelite, ndërsa banorët po përpiqeshin të ktheheshin në qytetet e tyre të pushtuara.

Televizioni i Hezbollahut shfaqi pamje të banorëve që po lëviznin drejt fshatrave, disa duke mbajtur flamurin e grupit. Izraeli akuzoi Hezbollahun për “nxehje” të situatës dhe tha se do të informonte banorët për vendet ku mund të ktheheshin. Hezbollah kërkoi që shteti libanez të sigurojë tërheqjen e Izraelit, ndërsa Shtëpia e Bardhë kërkoi një zgjatje të përkohshme të armëpushimit.

/ abcnews.al