Zvicra duhet të investojë 4 miliardë franga për të parandaluar mungesën e energjisë elektrike

Masat për parandalimin e një mungese të energjisë elektrike do t’u kushtojnë konsumatorëve zviceranë rreth 4 miliardë franga gjatë 20 viteve të ardhshme, raporton gazeta NZZ am Sonntag, duke iu referuar përllogaritjeve të organizatës ekonomike Economiesuisse.

Sipas shifrave të Economiesuisse, kostot lidhen me masat e ndryshme të rezervës së energjisë elektrike, të cilat synojnë të garantojnë furnizimin në rast të një krize të mundshme.

Pavarësisht kostos së lartë, Economiesuisse i mbështet këto masa, me argumentin se një mungesë e energjisë elektrike mund t’i shkaktojë ekonomisë zvicerane dëme shumë më të mëdha.

Sipas raportimeve, kostot e larta lidhen edhe me faktin se Zvicra ka neglizhuar për vite me radhë zhvillimin e kapaciteteve të prodhimit të energjisë elektrike, veçanërisht gjatë muajve të dimrit.

Termocentralet rezervë, 2.3 miliardë franga

Në kuadër të masave të propozuara, parashihet ndërtimi i katër termocentraleve të reja rezervë me lëndë djegëse fosile. Projekti, i propozuar nga këshilltari federal dhe ministri i Energjisë, Albert Rösti, pritet të kushtojë rreth 2.3 miliardë franga.

Megjithatë, Komisioni i Financave i Këshillit Kombëtar e ka vënë në pikëpyetje urgjencën e kësaj mase. Komisioni kritikon gjithashtu faktin se nuk janë shqyrtuar alternativa më të lira për garantimin e furnizimit me energji.

Edhe një raport i Kontrollit Federal të Financave, i cili pritet të publikohet në shtator, thuhet se është kritik ndaj këtij projekti.

Zvicra po përballet me nevojën për të forcuar sigurinë energjetike, veçanërisht për të përballuar periudhat e dimrit kur kërkesa për energji rritet dhe prodhimi vendas mund të mos jetë i mjaftueshëm.

The post Zvicra duhet të investojë 4 miliardë franga për të parandaluar mungesën e energjisë elektrike appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.