8 shenjat paralajmëruese të Prediabetit

Diabeti është një problem i madh shëndetësor në Shtetet e Bashkuara. Gjithsej 37.3 milionë njerëz në Amerikë kanë diabet, që është rreth 11 për qind e popullsisë. Dhe ndoshta edhe më shqetësuese – vlerësohet se 8.5 milionë nga ata njerëz janë të padiagnostikuar.

Prediabeti është një gjendje që përfundimisht mund të çojë në diabet dhe prek një numër edhe më të madh njerëzish: rreth 96 milionë njerëz të moshës 18 vjeç e lart kanë prediabet. Kjo është 38% e popullsisë!

Prediabeti mund të mos vijë gjithmonë me simptoma specifike për të gjithë. Lexoni më tej për të mësuar rreth disa prej shenjave të mundshme paralajmëruese të prediabetit dhe diabetit.

Çfarë është Prediabeti?

Prediabeti do të thotë që sheqeri në gjak është më i lartë se normalja, por ende jo aq i lartë sa të konsiderohet diabeti i tipit 2.

Prediabeti mund të rrisë rrezikun e sëmundjeve të zemrës dhe të dëmtojë enët e gjakut me kalimin e kohës. Nëse nuk trajtohet, mund të çojë në kushte si diabeti i tipit 2, presioni i lartë i gjakut, obeziteti, kolesteroli i lartë dhe sëmundjet e veshkave.

Lajmi i mirë është se përparimi nga prediabeti në diabet nuk është gjithmonë i pashmangshëm. Disa ndryshime të jetesës së shëndetshme, si një dietë e shëndetshme dhe e ekuilibruar, aktiviteti i duhur fizik dhe mbajtja e një peshe të shëndetshme mund të ndihmojnë në mbajtjen e niveleve të balancuara të glukozës.

Disa nga gjërat që mund t’ju vënë në një rrezik më të lartë të zhvillimit të prediabetit përfshijnë:

• Obeziteti
• Një dietë e varfër
• Mungesa e aktivitetit fizik
• Presioni i lartë i gjakut
• Konsumimi i alkoolit dhe duhanit
• Faktorët gjenetik
• Kushtet shëndetësore, si Apnea e gjumit

Simptomat dhe shenjat paralajmëruese të prediabetit

Për shumë njerëz, simptomat e prediabetit mund të mos jenë të dukshme. Disa simptoma të mundshme të prediabetit mund të jenë të fshehura ose të padallueshme, prandaj është e rëndësishme të jeni të vetëdijshëm se çfarë janë ato. Ka disa shenja paralajmëruese për t’u kujdesur që mund të tregojnë se prediabeti ka përparuar në diabetin e tipit 2.

Mungesa e këtyre shenjave nuk do të thotë që ju nuk keni prediabet ose sheqer të lartë në gjak dhe vetëm mjeku juaj mund të përjashtojë ose të diagnostikojë prediabetin ose diabetin. Nëse jeni të shqetësuar për sheqerin në gjak, vizitoni mjekun tuaj.

Këtu janë 8 simptomat kryesore të mundshme të prediabetit që duhet të keni parasysh:

1. Shtim oreksi

Një oreks i shtuar, i quajtur gjithashtu hiperfagi ose polifagi, mund të jetë një shenjë e sheqerit të lartë kronik në gjak. Është gjithashtu një nga shenjat kryesore të diabetit të tipit 2.

Kur sheqeri në gjak mbetet i lartë, si për shembull në diabetin e pakontrolluar ku receptorët e insulinës mund të mos funksionojnë në mënyrë optimale, glukoza nuk mund të hyjë në qelizat tuaja dhe të përdoret si energji. Kjo mungesë energjie mund të shkaktojë një rritje të urisë.

2. Goja e thatë

Goja e thatë është një simptomë e zakonshme e sheqerit të lartë në gjak dhe shpesh është simptoma e parë e dukshme e diabetit. Tharja e gojës mund t’u ndodhë të gjithëve herë pas here dhe mund të mos tingëllojë aq serioze.

Por goja e thatë kronike mund të shkaktojë erë të keqe, buzë të plasaritura ose të çara, dhëmbë të liruar, plagë në gojë, dhimbje në gojë ose fyt dhe probleme me përtypjen, gëlltitjen ose të folurit. Nëse keni gojë të thatë, bisedoni me mjekun tuaj.

3. Luhatje humori

Sheqeri i paqëndrueshëm i gjakut dhe hiperglicemia shoqërohen me një rrezik të shtuar të depresionit, ankthit, zemërimit dhe ndryshimeve të humorit. Sipas një studimi, simptomat e ankthit mund të prekin deri në 40 për qind të njerëzve me diabet.

4. Urinim i shpeshtë

Urinimi i shpeshtë, mund të shkaktohet nga sheqeri i lartë në gjak dhe është një nga simptomat kryesore të diabetit. Kjo gjithashtu mund të lidhet me polidipsinë, ose etjen e tepruar, e cila është një tjetër simptomë e zakonshme e prediabetit.

Në rastin e poliurisë, glukoza e tepërt në gjak tërheq më shumë ujë nga ndarjet intersticiale dhe i detyron veshkat tuaja të punojnë më shumë. Jo i gjithë sheqeri mund të filtrohet, kështu që përfundon në urinë. Nivelet më të larta të glukozës në urinë njihen si glucosuria.

5. Humbje peshe e pashpjegueshme

Humbja e pashpjegueshme e peshës është në fakt një nga shenjat e para paralajmëruese se prediabeti ka përparuar në diabet të tipit 2. Ja çfarë mund të kontribuojë në këtë lloj humbje peshe:

• Insulina e pamjaftueshme e ndalon trupin të përdorë glukozën si energji.
• Trupi fillon të djegë yndyrë dhe muskuj për energji, gjë që mund të shkaktojë humbje peshe.

Humbja ose shtimi i peshës me kalimin e kohës është normale. Por, nëse keni përjetuar humbje të pashpjegueshme ose të paqëllimshme të peshës në gjashtë deri në 12 muajt e fundit ose më pak, duhet të flisni me mjekun tuaj.

6. Lodhje dhe përgjumje gjatë gjithë kohës

Lodhja është një simptomë e zakonshme e sheqerit të lartë në gjak, si dhe diabeti i tipit 1 dhe tipi 2. Lodhja ka një sërë shkaqesh, kështu që mund të jetë e vështirë të kufizohet një shkak i saktë i lodhjes në diabet.

Një shkak i mundshëm është rezistenca ndaj insulinës, e cila lidhet me prediabetin. Nivelet e luhatshme të sheqerit në gjak mund të çojnë gjithashtu në ndjenjën e lodhjes, veçanërisht kur episodet e hiperglicemisë ndodhin shpesh.

7. Mpirje ose ndjesi shpimi gjilpërash në duar dhe gishtërinj

Sheqeri i lartë në gjak mund të shkaktojë dëmtim të nervave në trup, më së shpeshti në duar ose këmbë. Kjo quhet neuropati diabetike dhe në fakt mund të jetë një shenjë se prediabeti ka përparuar në diabet.

Nëse përjetoni simptoma si mpirje ose ndjesi shpimi gjilpërash të pashpjegueshme, konsultohuni me një profesionist të kujdesit shëndetësor për udhëzime të mëtejshme.

8. Shikim i paqartë

Shikimi i paqartë përdoret për të përshkruar paaftësinë për të parë detaje të imta dhe mungesën e mprehtësisë së shikimit. Sheqeri  i ulët në gjak, ose hipoglikemia, gjithashtu mund të ketë këtë efekt në sytë tuaj. Me kalimin e kohës, njerëzit me diabet mund të jenë në një rrezik në rritje të zhvillimit të retinopatisë, e cila përfundimisht mund të çojë në verbëri nëse nuk trajtohet.

Si trajtohet Prediabeti?

Disa zgjedhje të stilit të jetesës mund të ndihmojnë në kthimin e sheqerit në gjak në një interval normal, ose ta pengojnë atë të kthehet në diabet të tipit 2. Nëse jeni diagnostikuar me prediabet, duhet të punoni me mjekun tuaj për të kuptuar se çfarë ndryshimesh mund të bëni për të ulur sheqerin në gjak.

Disa ndryshime të mundshme të stilit të jetesës mund të përfshijnë:

1) Ndryshimi i dietës suaj

Një dietë që përmban proteina të mjaftueshme, drithëra të pasura me fibra, arra dhe perime shumëngjyrëshe, si dhe yndyrna të shëndetshme si vaji i ullirit, lidhet me një rrezik më të ulët të prediabetit. Minimizimi i karbohidrateve të rafinuara duke përfshirë sheqerin e shtuar mund të ndihmojë gjithashtu në rregullimin e sheqerit në gjak.

2) Aktiviteti fizik

Ushtrimi mund të ndihmojë trupin tuaj të përdorë sheqerin e tepërt të gjakut për energji dhe të përdorë insulinën në mënyrë më efektive.

Aktiviteti fizik i moderuar, si ecja, Yoga dhe ngritja e peshave të lehta janë një mënyrë e mirë për të vënë trupin në lëvizje.

3) Mbani një peshë të shëndetshme trupore

Përqendrimi në ndryshimet e përhershme në dietën tuaj dhe zakonet e stërvitjes mund t’ju ndihmojë të mbani një peshë të shëndetshme trupore dhe të menaxhoni sheqerin në gjak.

4) Lënia e duhanit

Ndalimi i pirjes së duhanit në fakt mund të përmirësojë përdorimin e insulinës nga trupi, gjë që mund të ketë një efekt pozitiv në nivelet e sheqerit në gjak.

5) Merrni të gjitha medikamentet siç përshkruhet

Nëse jeni në rrezik serioz për zhvillimin e diabetit, mjeku juaj mund të përshkruajë medikamente për të kontrolluar sheqerin në gjak. Merrni të gjitha medikamentet sipas udhëzimeve të mjekut tuaj./ Nutrisense

Përktheu për Gazetën Shëndeti, Griselda Ozuni