Bazel prezanton qilimin më të gjatë në historinë e Eurovisionit

Më 11 maj 2025, qyteti i Bazelit do të bëhet skenë e një momenti historik në kuadër të Eurovision Song Contest (ESC), duke shtruar qilimin më të gjatë “turkuaz” që është parë ndonjëherë në këtë ngjarje muzikore.

Sipas organizatorëve zviceranë, qilimi do të shtrihet nga ndërtesa e bashkisë së qytetit, duke kaluar mbi lumin Rhein e deri tek qendra e ekspozitave. Delegacionet e vendeve pjesëmarrëse do të përshkojnë këtë rrugë të veçantë me tramvaje të vjetra, të rrethuara nga tifozë dhe publik të zjarrtë. Kjo është pjesë e një koncepti spektakolar që synon të lërë gjurmë në historinë e Eurovisionit, transmeton albinfo.ch.

Ngjarja u prezantua nga moderatorët televizivë Sven Epiney dhe Mélanie Freymond, të cilët do të jenë gjithashtu nikoqirë të shfaqjes paraprake dhe transmetimeve publike në “Arena Plus”.

Producentët ekzekutivë, Reto Peritz dhe Moritz Stalder, theksuan se të gjitha biletat për eventet janë shitur. Rreth 56% e tyre janë blerë nga qytetarë zviceranë, ndërsa pjesa tjetër nga Gjermania (15%) dhe Mbretëria e Bashkuar (8%).

Eurovisioni 2025 në Bazel premton të jetë jo vetëm një festival muzikor, por edhe një përvojë unike kulturore dhe vizuale për publikun vendas dhe ndërkombëtar.

The post Bazel prezanton qilimin më të gjatë në historinë e Eurovisionit appeared first on Albinfo.