Ish-lojtari i Milanit mezi pret rikthimin në Serie A: Kam diçka për të vërtetuar

Pas një sezoni të vetmuar te Milani, menjëherë pas fitores së Scudettos në vitin 2022, aventura e Sergino Dest në Serie A përfundoi pa bujë dhe pa keqardhje të mëdha nga asnjëra palë.

Megjithatë, mbrojtësi amerikan duket se ruan një ndjenjë të veçantë për futbollin italian, një lloj nostalgjie të kundërt, siç e përshkruan ai vetë.

I konsideruar dikur një talent premtues, Dest iu bashkua Barcelonës në moshën 20-vjeçare dhe regjistroi afër 70 paraqitje me klubin katalanas.

Sot, në moshën 25-vjeçare dhe titullar i rregullt me PSV-në, ai pranon se karriera e tij nuk ndjehet ende e plotësuar.

Në prag të sfidës ndaj Napolit në Ligën e Kampionëve, ai shprehu hapur një ambicie të hershme.

“Do të doja shumë të kthehesha në Itali një ditë, ndiej se kam diçka për të provuar atje”.

Kjo nuk është hera e parë që Dest flet për një rikthim të mundshëm. Në një intervistë më herët gjatë vitit 2024, ai reflektoi mbi kohën e kaluar te Milan.

“E shijova shumë në Milano, por nuk isha gati. Ishte një mësim i rëndësishëm. Pata vështirësi me gjuhën, Pioli fliste vetëm italisht, unë flisja vetëm anglisht dhe nuk isha i motivuar për të mësuar pasi isha atje i huazuar”.

Tashmë i rikthyer në formë dhe pjesë e planeve për Kombëtaren e SHBA-së në prag të Kupës së Botës, Dest duket i rilindur.

Por deklaratat e tij lënë të kuptohet se ëndrra e vërtetë nuk është shuar, ajo mund të jetë ende në Itali.