Milani fiton 4-0, por Amorim habit të gjithë: Kemi luajtur edhe më mirë

Trajneri i Milanit, Ruben Amorim, vlerësoi fitoren e thellë ndaj Red Bull Salzburgut, por nuk u pajtua me pretendimin se kjo ishte paraqitja më e plotë e skuadrës së tij. Tekniku portugez theksoi se ekipi ka zhvilluar ndeshje më të mira, pavarësisht rezultatit bindës.

Milani arriti një fitore të rëndësishme me rezultat 4-0 ndaj Red Bull Salzburgut, në ndeshjen e së enjtes mbrëma në “Red Bull Arena”. Skuadra austriake kishte qenë e pamposhtur në 15 ndeshje gjatë këtij sezoni, përpara përballjes me kuqezinjtë.

Protagonisti kryesor i mbrëmjes ishte Alphadjo Cisse, i cili realizoi një het-trik brenda 50 minutave. Sulmuesi fillimisht shënoi me kokë, përpara se të gjente rrugën e rrjetës edhe me të dyja këmbët. Gonçalo Ramos, i futur nga stoli, vulosi fitoren 4-0, ndërsa Filippo Terracciano u ndëshkua me karton të kuq në minutat e fundit, transmeton ORAinfo.

Amorim: Kemi zhvilluar ndeshje më të mira

Pas përfundimit të takimit, Amorim foli për Sky Sport, duke analizuar paraqitjen e skuadrës së tij dhe duke komentuar paraqitjen e Cisses.

“Në ndeshjet e tjera kemi pasur më shumë kontroll, por sot arritëm të shënonim. Mendoj se në përgjithësi kemi zhvilluar ndeshje më të mira, por në fund njerëzit shohin vetëm rezultatin. Gjithsesi, jam i lumtur me fitoren”, deklaroi trajneri i Milanit.

I pyetur për paraqitjen e shkëlqyer të Cisses, i cili realizoi tre gola, Amorim u shpreh:

“Për mua, ai e meriton hapësirën që po merr për shkak të asaj që po tregon fizikisht. Është një lojtar shpërthyes. Megjithatë, ka ende punë për të bërë dhe duhet të përmirësohet edhe në stërvitje.

Sonte meriton përgëzime të mëdha. Het-triku i tij ishte i jashtëzakonshëm, por duhet të vazhdojë të punojë.”

“Kemi ende gjëra për të përmirësuar”

Pavarësisht rezultatit bindës, Amorim nuk i fshehu problemet që vuri re gjatë ndeshjes. Sipas tij, Milani duhet të përmirësojë qarkullimin e topit dhe ndërtimin e aksioneve nga prapavija.

“Nuk jam dakord me pretendimin se vetëm sonte kemi luajtur mirë. Mendoj se si skuadër kemi qenë më të mirë edhe në ndeshje të tjera.

Sot luajtëm mirë, por në disa situata, nëse kundërshtari do të kishte qenë më i saktë, do të kishte shënuar kundër nesh. Humbëm disa topa pranë zonës sonë të rreptësisë dhe patëm probleme në ndërtimin e lojës. Duhet të punojmë për këtë”, theksoi ai.

Konkurrenca në skuadër është thelbësore

Amorim shpjegoi edhe arsyen pse vendosi t’u japë minuta disa futbollistëve që deri më tani kishin luajtur pak.

“Unë besoj tek ata. Nuk mund të aktivizoja të njëjtin formacion në ndeshjet e ardhshme. Sigurisht, ka rreziqe. Nëse do të kishim humbur sonte, e di se çfarë do të kishin thënë njerëzit. Mundohem të bëj më të mirën për ekipin dhe t’i bëj gjërat në mënyrën e duhur. Sonte gjithçka shkoi mirë”, u shpreh portugezi.

Ai nënvizoi se Milani ka nevojë për 22 lojtarë konkurrues, të cilët janë të gatshëm të luftojnë për një vend në formacion.

“Gjëja më e rëndësishme për një skuadër është që të gjithë ta kuptojnë dhe të besojnë se mund të luajnë, por njëkohësisht të jenë të vetëdijshëm se mund ta humbin vendin e tyre. Prandaj më duhen 22 lojtarë konkurrues.

Me ndeshje të tilla, futbollistët fitojnë më shumë besim në vetvete. Për lojtarët e rinj, si dhe për Loftus-Cheek, kjo ndeshje do të jetë shumë e dobishme. Ai ishte shumë agresiv sot kur skuadra nuk e kishte topin dhe po punojmë për këtë aspekt.”

Amorim flet edhe për Camardan

Në fund, trajneri i Milanit komentoi edhe paraqitjen e Francesco Camardas, duke vlerësuar inteligjencën e tij në lojë, por duke theksuar se sulmuesi i ri duhet të përmirësohet fizikisht.

“Camarda e lexon mirë lojën. Duhet të përmirësojë shpërthyeshmërinë, shpejtësinë dhe ritmin. Po punojmë për këtë. Ai ka aftësinë të vrapojë për të gjitha 90 minutat, por duhet të vazhdojë të përmirësohet.

Kjo është diçka që i mungoi sërish sonte, edhe pse ai di të lëvizë në zonën e rreptësisë dhe ka shumë cilësi”, përfundoi Amorim. /ORAinfo/

Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.