Si ndikojnë antidepresivët në peshë dhe si mund të menaxhohet efekti i tyre?

Antidepresivët janë ilaçe jetike për shumë persona, por përdorimi i tyre mund të vijë me disa efekte të padëshiruara, përfshirë ndryshime në peshë.

Sipas psikiatres Dr. Divya Singh, shtimi në peshë ndodh tek 25 deri 30% e pacientëve, megjithëse disa të dhëna tregojnë se ky efekt vërehet edhe tek 55 deri 65% e përdoruesve.

Shtimi në peshë nuk varet vetëm nga ilaçi

“Jo gjithçka varet nga ilaçi; tek personat me depresion apo ankth shpesh ndodhin ndryshime të oreksit dhe të nivelit të aktivitetit fizik,” shpjegon Dr. Singh. Vaktet e bollshme si një formë ngushëllimi janë të zakonshme, pasi trupi dhe truri përjetojnë ndryshime që ndikojnë në nevojën për ushqime kalorike me shumë yndyrë, kripë dhe sheqer. Disa zhvillojnë modele të teprimit me ushqim për të përballuar dhimbjen emocionale.

Antidepresivët ndikojnë në sekretimin e neurotransmetuesve serotonin dhe dopamin, të cilët rregullojnë humorin dhe oreksin. Me kalimin e kohës, këto ndryshime mund të rrisin ndjenjën e urisë ose të ngadalësojnë metabolizmin.

Jo të gjithë antidepresivët ndikojnë njësoj në peshë

Dr. Singh thekson se efekte të ndryshme kanë ilaçe të ndryshme dhe kjo varet edhe nga kohëzgjatja e përdorimit. Ilaçet më shpesh të lidhura me shtim në peshë përfshijnë:

Antidepresivët triciklikë

Inhibitorët e monoaminooksidazës

Inhibitorët selektivë të rimarrjes së serotoninës (SSRI)

Antidepresivin tetraciklik mirtazapin

Analizat e mëdha tregojnë se këto ilaçe mund të çojnë në rritje të peshës deri në 5%. Nga ana tjetër, disa antidepresivë si bupropioni mund të sjellin humbje kilogramësh.

Rreziqet varen edhe nga pacienti

Shtimi në peshë nuk lidhet vetëm me ilaçin, por edhe me stilin e jetesës, gjenetikën dhe indeksin fillestar të masës trupore. Personat me aktivitet fizik minimal, ushqime të pasura me kalori, diabet ose funksion të ulët të tiroides janë më të rrezikuar.

Zakone që ndihmojnë

Ushqim i pasur me fruta, perime, proteina të dobëta dhe drithëra integrale

Aktivitet fizik të paktën 30 minuta në shumicën e ditëve

Gjumë 7–9 orë për natë

Menaxhimi i stresit përmes meditimit, yogës ose psikoterapisë

Kontroll i rregullt i peshës trupore, por pa u fiksuar pas shifrave

Mos ndërprisni terapinë vetë

Të gjithë mjekët këshillojnë që terapia nuk duhet ndërprerë ose ndryshuar vetë. Çdo modifikim duhet bërë vetëm me rekomandim të mjekut, përfshirë ndryshimin e ilaçit, përshtatjen e dozës ose kontrollin e funksionit të tiroides.

Dr. Singh përfundon duke theksuar se antidepresivët mund të ndikojnë në peshë, por me një kombinim të terapisë së duhur dhe zakoneve të shëndetshme kjo sfidë mund të menaxhohet me sukses, duke përmirësuar ndjeshëm jetën e pacientëve.

Sinjali – aty ku e vërteta flet para lajmit!

/GazetaSinjali/

The post Si ndikojnë antidepresivët në peshë dhe si mund të menaxhohet efekti i tyre? appeared first on Sinjali.