Arrestohet aktivisti palestinez në SHBA, udhëhoqi protestat në Universitetin e Kolumbias

Një aktivist palestinez, i cili ndihmoi në udhëheqjen e lëvizjes së studentëve të Universitetit të Kolumbias, u arrestua të shtunën mbrëma nga autoritetet federale të imigracionit, të cilët pretenduan se po vepronin sipas një urdhri të Departamentit të Shtetit për të hequr kartën e tij jeshile, sipas avokates së tij.

Mahmoud Khalil ishte në apartamentin e tij në pronësi të universitetit, blloqe nga kampusi kryesor i universitetit privat të Ivy League në Nju Jork, kur disa agjentë të Emigracionit dhe Doganave (Ice) hynë në ndërtesë dhe e morën atë në paraburgim, tha avokatja e tij, Amy Greer, për Associated Press.

Një nga agjentët i tha Greer se ata po ekzekutonin një urdhër të departamentit të shtetit për t’i hequr vizën studentore Khalilit. I informuar nga avokati se Khalil, i cili u diplomua dhjetorin e kaluar, ishte në Shtetet e Bashkuara si rezident i përhershëm me një kartë jeshile, agjenti tha se ata po e revokonin edhe atë.

Arrestimi vjen pasi Donald Trump është zotuar të dëbojë studentë të huaj dhe të burgosë të përfshirët në protestat kundër luftës së Izraelit në Gaza. Administrata e Trump njoftoi të premten se do të shkurtojë 400 milionë dollarë grante dhe kontrata për Universitetin e Kolumbias në dritën e incidenteve anti-semite./abcnews.al